Akarere ka Gatsibo ni kamwe mu turere two mu Ntara y’Iburasirazuba tugira umusaruro uhagije w’igihingwa cy’urutoki, by’umwihariko mu Murenge wa Kiziguro wo muri aka Karere, ni umwe mu mirenge igira umusaruro uhagije.
Muri uyu Murenge wa Kiziguro ubuso buhinzweho urutoki bungana na hegitarKirehe. ukaba ari umurenge weramo ibitoki bihagije kuko babyitayeho cyane bakabirinda indwara ya Kirabiranya yibasiye insina nyinshi mu Rwanda.
Umuyobozi w’Umurenge wa Kiziguro yagiranye ikiganiro na MUHAZI YACU, avuga ko iki gihingwa ari kimwe mu byitabwaho muri uyu murenge, ku buryo hari abaturage bahoze mu bukene bakabwigobotora babicyesha ibitoki.
Ntaganda Gaston, Umuyobozi w’umusigire mu Murenge wa Kiziguro, yagize ati: “Abaturage beza ibitoki byinshi, bimwe bakabirya ibindi bakabijyana mu isoko, bakabasha gukemura ibindi bibazo bafite mu buzima bwabo bwa buri munsi.”
Ntaganda agaragaza ko ibi byose bamaze kugeraho, bitapfuye kwizana gutyo gusa ahubwo ko babiharaniye kugira ngo babe bari mu ba mbere beza ibitoki.
Agira ati: “Twatangiye dushishikariza abaturage guhinga imbuto igezweho y’urutoki, ubundi mbere bihingiraga imbuto yitwa indaya igakura yihuta ariko ntitange umusaruro, kandi igaca urundi rutoki rusanzwe rw’inyamunyu, nyuma baje kuyireka bahinga imbuto igezweho, ikindi ni uko twaciye indwara ya kirabiranya mu nsina zacu.”
Akomeza asaba abashoramari kuza kubyaza amahirwe uyu musaruro uboneka muri uyu murenge, bakawushoramo imari abaturage bakabona amafaranga kandi nabo bashoramari bakunguka.
Ati: “Mu by’ukuri abashoramari turabakangurira kuza kureba uburyo twita ku nsina zacu n’umusaruro uhagije tubona, twiteguye kubaha umusaruro wacu kuko turawufite uhagije, abafite amahoteri batugane twiteguye guhaza abakiriya babo nta kibazo.”
Kayogire ni umuhinzi w’urutoki wabigize umwuga, avuga ko guhinga urutoki ntacyo yabinganya kuko bimaze kumugeza kuri byinshi, avuga ko yatangiye kuruhinga mu mwaka wa 2004 kugeza ubu bimaze kumuteza imbere mu buryo bugaragara. Kuri ubu ahinga kuri hegitari eshanu.
Yagize ati: “Ubuhinzi bw’urutoki bumaze kungeza kuri byinshi, uko nagendaga mbona amafaranga avuye muri ubwo buhinzi naguraga ubutaka nkahita mbuteramo urutoki, kuri ubu maze kugera ku buso bunini bw’urutoki.”
Akomeza ashishikariza bagenzi be nabo guhinga urutoki mu buryo bugezweho kandi bwa kinyamwuga, kandi abacyenera ubufasha ahora yiteguye kubutanga.
Ati: “Urutoki iyo uruhinze neza ubasha kubona ibyo kurya, ukabona amafaranga kandi mu buryo buhoraho, abashaka rero bazatugane tubigishe uko bahinga urutoki.”
Urutoki ni kimwe mu bihingwa bihingwa ahantu hatandukanye kandi bitunze Abanyarwanda benshi. Akarere ka Gatsibo ni kamwe mu dufite ubutaka bwiza bweramo iki gihingwa cy’urutoki ku bwinshi, dore ko kaza ku mwanya wa gatatu ku rwego rw’igihigu, inyuma y’uturere twa Ngoma na Kirehe.
