Ishyirahamwe ry’umukino w’amagare mu Rwanda[FERWACY] ryatangaje urutonde rw’amasiganwa ku magare ateganyijwe kuba muri uyu mwaka wa 2024, rugaragaza ko irikorwa ku bufatanye n’Akarere ka Kirehe rizwi nka ‘Kirehe Race’ rizaba tariki 12 -13 Ukwakira 2024.
FERWACY yatangaje ko muri rusange muri uyu mwaka wa 2024 by’umwihariko guhera mu kwezi kwa Kanama kugeza mu Ukuboza, hateganyijwe amasiganwa y’amagare atandatu[Umusambi Gravel Race, Kibugabuga Race, Kirehe Race, Kivu Belt Race, Akagera Rhino Race]; akazabimburirwa na Shampiyona y’Igihugu y’Amagare iteganyijwe ku matariki 17-18 Kanama 2024.
Ibinyuije ku rubaga rwa X FERWACY yagize iti: “Hateganyijwe amasiganwa atandatu muri aya mezi atanu ari imbere, azahera kuri Shampiyona 2024 izaba ku wa 17-18/8/2024.”
Isiganwa rya Kirehe Race biteganyijwe ko rizaba iminsi ibiri ku wa Gatandatu tariki 12 no ku Cyumweru tariki 13 Ukwakira, rizaba ribaye ku nshuro ya 3.
Ni isiganywa ryitabirwa n’abasiganwa babigize umwuga mu Rwanda mu bagabo n’abagore, ndetse n’abatarabigize umwuga bagasiganwa mu rwego rwo gushaka abanyempano muri uyu mukino w’amagare.
Kirehe Race iherutse kuba mu mwaka ushize wa 2023 yabaye tariki 30 Nzeri kugeza tariki 01 Ukwakira, yegukanwe na Ingabire Diane na Munyaneza Didier
