Abantu bafite ubumuga bo mu Karere ka Kirehe bagaragaza ko kwihitiramo umudepite ubuhagararira mu nteko ishinga amategeko ari iby’agaciro kenshi, bakagaragaza na bimwe mu byo bifuza ko uzatorwa yazitaho mu kubakorera ubuvugizi.
Kuri uyu munsi tariki 16 Nyakanga 2024 mu Karere ka Kirehe kimwe n’ahandi mu Gihugu, abagize inteko itora y’abantu bafite ubumuga mu Karere ka Kirehe bitabiriye amatora yo gutora umudepite uzabahagararira mu Nteko Ishinga Amategeko, ndetse abagore bagize inteko itora bitabiriye amatora y’abagore 24 bagize 30%.
MUHAZIYACU yaganiriye na bamwe mu bagize inteko itora y’abantu bafite ubumuga bagaragaza imbamutima zabo ndetse n’icyo bifuza ko cyarushaho kwitabwaho muri iyi manda y’imyaka itanu umudepite uzatsinda yazakora ku bantu bafite ubumuga.
Bahati Zipola wo mu Murenge wa Mpanga, yagize ati: “Nkatwe abantu bafite ubumuga twishimira ko dufite umudepite iduhagararira mu Nteko Ishinga Amategeko, ni iby’agaciro kuko ni byo bivamo bya bindi byiza tuzi abantu bafite ubumuga bakorerwa.”
Tuyambaze Philippe, yagize ati: “Mbere ya byose dushimira abahaye abantu bafite ubumuga agaciro, kuba ntoye uzaduhagararira biranshimishije kuko uwo dutora ni we uzageza ijwi ryacu mu nteko ishinga amategeko.”
Akomeza agira ati: “Abantu bafite ubumuga dusigaye dufite ijambo, no kuba twaje gutora ni indi ntambwe ariko mu by’ukuri kuba mu nteko ishinga amategeko dusangamo umuntu umwe uhagarariye abantu bafite ubumuga twifuza ko byazavugururwa. Abagarariye abantu bafite ubumuga bakarenga umwe bizafasha kurushaho kubona ubuvugizi ku bantu bafite ubumuga.”
Nyinawuntu Esther wo mu Murenge wa Nyamugari, ati: “Ni byiza kuri njye kumva ko hari umuntu uhagarariye abantu bafite ubumuga, kuba rero dutoye uzatubariza ndetse akanaduhagararira neza, turabyishimiye rero kuko abantu bafite ubumuga nibyo bizatuma dukomeza kwitabwaho.”
Ukomeza agaruka ku cyo bifuza k’uzatorwa, ati: “Icyo twifuza ko uri butsinde mu kuduhagararira mu nteko harimo kongera amashuri y’abana bafite ubumuga no kongera uburyo bafashwamo, haba kwiga ndetse no mu myigishirize, hongerwe abantu bafite ubumenyi ku rurimi rw’amarenga.”
Bahati we yagize ati: “Abantu bafite ubumuga twafashijwe kwiga ariko harabo usanga batabasha Kubona uburezi bukwiye.”
Amatora yo kuri uyu wa 16 Nyakanga mu byiciro byihariye, harimo ay’abadepite b’abagore bahatanira imyanya 30% mu nteko ishinga amategeko, abadepite babiri bahagarariye urubyiruko ndetse n’umudepite umwe uhagarariye abafite ubumuga.
