Ubuyobozi bw’Akarere ka Kirehe bwasabye abatsinze mu irushanwa ry’Umurenge Kagame Cup guharanira ko intsinzi babonye itarangirira ku rwego rw’aka Karere, ahubwo bakitegura neza kuzahesha ishema aka Karere nabo ubwabo ku rwego rw’Intara n’Igihugu.
Mu butumwa bwatanzwe n’Umuyobozi w’Akarere ka Kirehe wungirije ushinzwe iterambere ry’ubukungu Nzirabatinya Modeste kuri iki cyumweru tariki 21 Mutarama ku kibuga cy’umupira cya Nyakarambi, ahabereye imikino ya nyuma mu irushanwa Umurenge Kagame Cup 2023/2024 yasabye abatsinze ko intsinzi babyinnye itaba iya nyuma,
Ati: “Abatsinze mu gisoro, gusimbuka urukiramende, na ya mikino yose, Gahara uyu munsi ni yo yatsinze mu bakobwa kuri finali, naho mu bagabo mu mupira w’amaguru Mpanga ni yo yatsinze, turabasaba ko muva hano muhita mujya kwitegura, iyi ntsinzi mubyinnye hano ntibe ari iyo ya nyuma, tubakeneyeho ko mu cyumweru gitaha ku rwego rw’intara n’ubundi tuzatsinde, turifuza gutwara ibikombe by’intara kugira ngo tuzaseruke ku rwego rw’Igihugu.”
Mu mikino yabaye kuri iki cyumweru, mu mupira w’amaguru Ikipe y’Umurenge wa Mpanga ni yo yegukanye igikombe itsinze iy’Umurenge wa Gahara ibitego 3-2, naho mu bagore Ikipe y’Umurenge wa Gahara ni yo yegukanye iki gikombe itsinze iy’uwa Gatore 1-0.
Mu makipe yahataniye umwanya wa 3, abagore b’ i Mahama batsinze ab’i Nasho 1-0, naho abagabo ba Gatore batsinda ab’ i Mushikiri 3-1.
Ni imikino yitabiriwe n’abaturage mu byiciro bitandukanye yagiye inatangirwamo ubutumwa butandukanye nko gukangurira abaturage gutangira Mituweli ku gihe, kwizigamira muri Ejo Heza, kurwanya imirire mibi, kurwanya inda ziterwa abangavu, kwirinda ibiyobyabwenge, kunywa mu rugero; n’izindi gahunda zitandukanye.
MUHAZIYACU yavuganye na bamwe mu bayobozi b’imirenge ifite amakipe yitwaye neza, bagaragaza ingamba bafite aho bazaserukira akarere ku rwego rw’Intara.
Iyamuremye Antoine, Umunyamabanga Nshingwabikorwa w’Umurenge wa Mpanga yagize ati: “Dufite ikipe y’abagore izasohokera Akarere muri Volleyball nayo ni iyo mu murenge wacu, iya Basketball ndetse by’umwihariko n’uyu minsi muri Football ikipe yacu ni yo itwaye igikombe tukaba tuzaserukira akarere kandi turakora uko dushoboye tuzakomeze guhesha ishema akarere, tugiye gutegura cyane.”
Gitifu Iyamuremye yashimiye abatuye i Mpanga ko abana babo aribo batanze ibyishimo muri iri rushanwa, anashimira Ubuyobozi bw’Igihugu bwashyizweho aya marushanwa abera mu giturage, agatanga ibyishimo mu baturage hagamijwe kwimakaza imiyobore myiza n’umuco wo guhiga.
Naho Nsengimana Janvier, Umunyamabanga Nshingwabikorwa w’Umurenge wa Gahara yagize ati: “Twishimiye intsinzi y’abakobwa bacu mu by’ukuri twari twiteguye igikombe, turashimira abafatanyabikorwa badufashije n’ababyeyi bagiye bareka abana bakaza gukina, rero nk’uko twari dufite intego yo gutwara igikombe ku rwego rw’Akarere tukaba tuyigezeho, no kwitwara neza ku rwego rw’Intara, tukazatwara igikombe ku rwego rw’Igihugu turabiharanira kandi tuzabigeraho.”
Amakipe yatsinze mu yakinnye mu mupira w’amaguru mu byiciro byombi abagabo n’abagore, guhera ku ya mbere kugeza ku ya 3 buri imwe yahawe umupira wo gukina umwe, ku ikipe ya 3 ihembwa n’ibihumbi 100Frw, iya 2 ihembwa ibihumbi 150Frw, mu gihe ikipe ya mbere yo yahembwe ibihumbi 200Frw n’igikombe.
Kuri iki cyumweru hakinwe imikino ya nyuma mu mupira w’amaguru, mu gihe kuri uyu wa Gatandatu aribwo hari hakinwe imikino ya nyuma mu bindi byiciro muri iri rushanwa ry’Umurenge Kagame cup 2023/2024 nko gusiganwa ku maguru, ku magare, Basketball, Volleyball n’ibindi byiciro bitandukanye birimo n’imikino gakondo mu bagabo n’abagore.
