Ubuyobozi bw’Akarere ka Kirehe n’inzego z’umutekano bifatanyije n’abaturage bo mu Murenge wa Nyamugali n’abafite ababo bazize Jenoside yakorewe Abatutsi mu 1994 bishwe baroshywe mu mugezi w’Akagera ku mupaka wa Rusumo; ubuyobozi bwihanganisha abahaburiye ababo.
Ni igikorwa cyabaye kuri uyu Mbere tariki 10 Mata mu rwego rwo kwibuka ku nshuro ya 29 Jenoside yakorewe Abatutsi, ku kiraro kinini kiri hejuru y’Umugezi w’Akagera ugabanya u Rwanda na Tanzania ahafashwe umwanya wo kwibuka, kunamira Abatutsi baroshywe mu Kagera; banashyira indabo muri uwo mugezi.
Bamwe mu barokotse Jenoside Abatutsi bafite ababo baroshywe mu mugezi w’Akagera bavuga ko ibyabaye bigoranye kubyakira, gusa bahitamo kudaheranwa n’agahinda.
Mukabirasa Violette wabuze umubyeyi we waroshywe mu mugezi w’Akagera yagize ati: ”Ubu ngubu ubuzima burimo buragenda neza twariyubatse, dukurikirana amateka tukanumva amaradiyo muri iki gihe impanuro duhabwa n’ubuyobozi bwacu ziradufasha tukumva agahinda karagabanyuka, kandi ikindi nkanjye ubu mfite umuryango n’abana bituma niyubaka kandi nkashaka iterambere mu bikorwa dukora bya buri munsi.”
Yakomeje avuga ko kuba igihugu gifite umutekano uyu munsi nabyo bibafasha kandi bikamuha imbaraga zo guharanira gukora no gutera imbere.
Kazayire Colette na we wabuze abe benshi baroshywe muri uyu mugezi w’Akagera yagize ati:” Iki gihe nibwo nibuka ibyabaye ku muryango wanjye nkumva nshitse intege nkumva ntashaka kujya ahantu hari urusaku cyane, gusa ubusanzwe numva ko nkwiriye guheranwa n’agahinda ngerageza gukora imirimo nkandi nkashingira ku ijambo Nyakubahwa Perezida wa Repubulika aherutse kuvuga ngo ibyabaye byarabaye gusa ntibizongera kuba, iki kiduha imbaraga kandi kikatwubaka.”
Umuyobozi w’Akarere ka Kirehe Rangira Bruno yasabye ababuze ababo baroshywe mu Mugezi w’Akagera muri Jenoside yakorewe abatutsi 1994 kudaheranwa n’agahinda bagakomeza ubumwe bw’abanyarwanda kandi bagasenyera umugozi umwe wo kwiteza imbere.
Yagize ati: ”Hari intambwe imaze guterwa haba mu bumwe bw’abanyarwanda, guhangana n’amateka igihugu cyacu cyaciyemo kandi bikozwe n’abandi banyarwanda, isomo twararibonye ibyo mwaciyemo nabyo mukemera gutanga imbabazi n’ikintu gikomeye kandi kinagufasha kudaheranwa n’agahinda.”
Umubare w’abatutsi bose bishwe baroshywe mu mugezi w’ Akagera ntabwo uzwi, gusa hazwi umubare w’abashyinguye mu rwibutso ruherereye muri Tanzaniya ahashyinguwe mu cyubahiro imibiri igera kuri 917.
