Ubuyobozi bwa Kaminuza ya Kibungo yahoze yitwa UNATEK bwahagaritse abakozi 59 kugeza igihe leta izabemerera kongera kwakira abanyeshuri.
Ni icyemezo bwatangaje tariki ya 15 Gicurasi mu ibaruwa bwashyikirije aba bakozi bubamenyesha ko amafaranga yo kubahemba atakiboneka kubera abanyeshuri batakiga n’izindi ngamba zagiye zifatwa hagamijwe kurwanya icyorezo cya Coronavirus.
Mu itangazo ubuyobozi bwandikiye abakozi bwababwiye ko “Bubabajwe no kumenyesha abakozi bari ku mugereka bagera kuri 59 ko amasezerano y’akazi bari bafitanye na UNIK ahagaritswe guhera tariki ya 15 Gicurasi 2020, akasazubukurwa umunsi leta izemerera UNIK kongera kwakira abanyeshuri bo muri Campus ya Karenge, Musamvu, na Rulindo.”
Ubuyobozi bw’iyi kaminuza buvuga ko mu byangendeweho hahagarikwa aba bakozi harimo; Icyemezo ya leta cyo gufunga amashuri makuru na za kaminuza kugeza mu kwezi kwa cyenda 2020, icyemezo cya Mineduc cyo gufunga muri icyo gihe no gutanga amasomo ya E-learning ariko abanyeshuri ntibishyuzwe ntibakore ibizamini, bityo UNIK ikaba itabona amafaranga yo kwishyura abarimu, ingingo ya 18 y’itegeko rigenga umurimo mu Rwanda mu gika cyerekeye “ force majeure.
Bakomeje bagira bati “ Ingingo ya 66 y’itegeko rigenga umurimo mu Rwanda mu gika kivuga ko hahembwa uwakoze, inama twagiranye n’umugenzuzi w’umurimo ku wa 14 Gicurasi mu Karere ka Ngoma, ibiganiro by’inama y’ubuyobozi bwa UNIK byabereye kuri internet ku wa 14 Gicurasi,kuba inama zose z’abantu benshi zibujijwe na leta muri ibi bihe bya COVID-19.”
Umwe mu bakozi bahagaritswe yabwiye MUHAZIYACU ko kubahagarika byatinze ngo kuko n’ubundi bamaze igihe kinini bakora badahembwa yagize ati “ N’ubundi batinze kuduhagarika, guhagarika umuntu umaze amezi umunani utamuhemba birasekeje ahubwo baba barabikoze mu miza ya mbere.”
Iyi kaminuza ivugwamo ibibazo guhera mu myaka ine ishize byanatumye abanyeshuri bayigamo bava ku bihumbi bine bagera kuri 800, umwaka ushize minisitiri w’uburezi yarayisuye asiga asabye ko hakorwa igenzura ryimbitse hakamenyekana ibibazo byose biyirimo.
Mu biyivugwamo harimo gusesagura umutungo kugera naho abayikoramo bayiguriza, kudahemba abarimu bamwe bakanahitamo kwigendera ndetse no kuba iyi kaminuza itagira umuntu yanditseho ahubwo ngo yanditswe ku bantu 38 basa n’abadafite icyo bayimariye.
Kaminuza ya Kibungo yatangiye mu mwaka wa 2003 imaze gushyira ku isoko ry’umurimo abakozi babarirwa mu bihumbi icyenda yanafunguye irindi shami mu Karere ka Rulindo.
