Ubuyobozi bw’Akarere ka Kirehe bwahembye amakipe y’ibigo by’amashuri yitwaye neza mu marushanwa yabaye mu mwaka ushize wa 2021-2022, umuhango wabaye nyuma gato y’inama yigaga ku kuzamura imitsindire n’imitsindishirize muri aka karere.
Umuyobozi w’Akarere ka Kirehe wungirije ushinzwe iterambere ry’ubukungu Nzirabatinya Modeste ari kumwe n’umuyobozi w’Akarere wungirije ushinzwe imibereho myiza Mukandayisenga Janvière nibo bayoboye iyo nama yahuje abayobozi b’ibigo by’amashuri yigaga ku buryo bwo kongera imitsindire n’imitsindishirize, yabaye ku gicamunsi cyo kuri uyu wa 04 Ugushyingo.
Ku musozo w’iyi nama, nibwo Ubuyobozi bw’Akarere ka Kirehe bwatanze ibihembo ku makipe y’ibigo by’amashuri yahize ayandi mu mikino yahuje ibigo by’amashuri mu byiciro by’amashuri abanza n’ayisumbuye byo hirya no hino muri aka Karere mu mwaka wa 2021-2022, mu mikino irimo umupira w’amaguru Football n’indi mikino nka Volleyball, Basketball na Handball.
Mu guhemba amakipe yaje ku isonga mu mikino itandukanye Akarere kageneye ayahize ayandi igikombe n’umupira wo gukina, aho ahanini muri iyo mikino yose ibigo by’amashuri byahembwe harimo Paysannat LD, Rusumo High School, GS Nyakarambi, GS Rugarama II, Paysannat LC, Apeki Amizero n’ayandi.
Nzirabatinya Modeste Umuyobozi w’Akarere ka Kirehe wungirije ushinzwe iterambere ry’ubukungu yashimiye ibigo by’amashuri byitwaye neza haba mu mitsindire no mu mikino, abasaba gukomeza bagashyira imbaraga mu byo bakora.
Yasabye abayobozi b’ibigo by’amashuri “Guharanira ko umwana abona ishuri nk’ahantu akura ibyishimo kuko aribyo bimukundisha ishuri, akagira imyigire myiza, agatsinda neza, akigirira akamaro, akagirira akamaro umuryango we n’Igihugu cye.”
Nzirabatinya kandi yashimiye abayobozi b’ibigo by’amashuri ishyaka bari kugaragaza mu gushaka impinduka no kuzamura imitsindire y’abana, abasaba kurushaho.
