- Kuva tariki 14 Werurwe 2020 u Rwanda rubonye umuntu wa mbere wagaragaweho icyorezo cya COVID-19, hashyizweho ingamba zitandukanye zituma abantu bahama mu ngo zabo hirindwa ikwirakwira ry’iki cyorezo.
Benshi mu bantu bakunze kubihirwa no guhama mu rugo nyamara uwo mwanya uba ubonye ushobora kuwubyaza umusaruro wiyungura ubumenyi mu gusoma ibitabo, gukora siporo, kurushaho kuganira n’abo mu muryango wawe ndetse no kureba filimi zatuma urushaho kugubwa neza.
Muhaziyacu.rw yabateguriye imwe muri filimi yakozwe n’urubyiruko rukomoka mu Karere ka Rwamagana yagufasha gukomeza kugubwa neza mu rugo iwawe kandi unishimye. Iyo filimi yiswe “ Agakino” ivuga ku butekamutwe bukorerwa umukobwa uba uvuye muri leta zunze ubumwe za Amerika akabeshywa urukundo n’ubukwe.
Iyi filimi kandi igaragaramo uwo bita Bingo, Tesi ndetse na Cindy. Iyi filimi ikaba ishingiye kuri aba bakinnyi, igaragara ku rubuga nkoranyambaga rwa Youtube channel yitwa “Kagoma Online TV”.
Dushime Christian wanditse iyi filimi avuga ko yayikomoye ku bakobwa n’abahungu baba baba hanze y’igihugu bagakundana n’abandi bari imbere mu gihugu nyamara rimwe na rimwe ugasanga harimo ubeshya undi amukurikiyeho amafaranga.
Ati “ Nkimara kubona inkuru ya Cadette na Sano kandi nkurikije n’izindi nkuru zitandukanye tugenda twumva hirya no hino ugasanga umuntu ashakanye n’undi amukurikiranyeho imitungo, byanteye gukora iyi filimi kugira ngo yigishe abanyarwanda kujya bashishoza mu rukundo.”
Filimi Agakino ikaba izagira ibice bitatu, buri gice kizajya kigira isaha n’iminota 30. Kuri ubu igice cya mbere nicyo kimaze kujya hanze ibindi bice bikaba bizashyirwa hanze muri Gicurasi.
Inama y’Abaminisitiri idasanzwe yayobowe na Perezida Paul Kagame ku wa 1 Mata 2020 yanzuye ko igihe cyo gufunga ibikorwa bitandukanye n’imipaka y’igihugu cyongerwaho iminsi 15 mu gukomeza kwirinda ikwirakwira ry’icyorezo cya COVID-19. Abanyarwanda bakaba basabwa gukomeza kuguma mu ngo zabo kugeza tariki ya 19 saa 23:59.
