Ku mugoroba wo kuwa gatatu, tariki ya 20 Mutarama, inzego z’umutekano n’iz’ibanze zikorera mu Murenge wa Kabarondo mu Karere ka Kayonza zafashe umugabo witwa Rwabuhenda Jean Claude w’imyaka 35, wari warahinze ibiti 157 by’urumogi mu rugo iwe.
Uyu mugabo yari atuye mu Kagari ka Kabura, mu Mudugudu w’Akagarama, ngo yari yarazitiye urugo rwe ku buryo ntawamenya ibibera mu rugo imbere ndetse n’abaturanyi ngo bamutinyaga ku buryo ntawashoboraga kwinjira iwe.
Umunyamabanga Nshingwabikorwa w’Umurenge wa Kabarondo, Kagabo Jean Paul, yabwiye MUHAZIYACU ati: “Yari yarahinze urumogi mu gipangu cye, yaragiye urugo araruzitira rwose, asiga imbere gusa, nka kwakundi abantu bagira uturima tw’igikoni, uriya we akarima k’igikoni kari urumogi.”
Ngo nta muntu wajyaga yinjiramo, ngo no kugira ngo uhagere keretse uciye mu nzu ye. Gitifu ati: “Ntawashoboraga kuhagera, baramutinya ngo yari icyihebe, batinyaga ko uwahagera yamugirira nabi.”
Uyu mugabo ngo agifatwa yavuze ko ari we wabihinze ndetse anababwira ko yahoraga yiteguye ko isaha n’isaha yafatwa.
Ikigero cy’ibiti by’urumogi ugereranyije uko bisa ngo byasaga n’aho bitaribyatangira gusarurwa, ariko byari bimaze gukura byatangiye kuzana imbuto.
Gitifu Kagabo avuga ko uyu mugabo yabaga wenyine kuko yari amaze igihe yirukanye umugore we barananiranywe.
Uyu muyobozi agira abaturage inama yo kwirinda ibiyobyabwenge aho biva bikagera, agira ati: “Turabashishikariza kwirinda urumogi, kanyanga, rwose nta cyiza cyabyo, ni ukwica umubiri w’umuntu, ni ugushajisha abantu imburagihe. Ntakivamo kitari ukurangira ufuzwe, turabasaba gukora ibyemewe.”
Anibutsa abaturage ko kuba u Rwanda rwaremeje itegeko rijyanye na gahunda yo guhinga urumogi rugenewe ubuvuzi, bitavuze ko buri wese uruhinze aba adakoze icyaha.
Ati: “Tukimufata yashatse kwitwaza ko u Rwanda rwemeje itegeko ryerekeye guhinga urumogi, aratubwira ngo numvishe ibyo nanjye mpita nduhinga, turamubaza tuti none se Leta yahaye uburenganzira abantu bose? Ariko yabuze icyo kuvuga, ntakindi yari kuvuga.”
Icya kabiri uyu muyobozi asaba abaturage ni ugukomeza guhanahana amakuru n’inzego z’ubuyobozi, atanga urugero ko n’ubwo ayo makuru y’uwahinze urumogi babimenye kubera abaturage babibwiye umuyobozi w’umugugudu nawe akabibwira abo bireba.
