Minisitiri w’Ibikorwaremezo, Dr. Jimmy Gasore, yagaragaje ko kuvugira kuri telephone utwaye ikinyabiziga bizajya biba ari ikosa gusa mu gihe utwaye ikinyabiziga afashe telefone mu ntoki.
Ibi Minisitiri w’ibikorwaremezo, yabigarutseho kuri uyu wa 29 Ukuboza 2025, ubwo yari mu nteko ishinga amategeko umutwe w’Abadepite.
Muri iyi nteko, Abadepite basesenguraga ingingo z’itegeko rigenga imikoreshereze y’umuhanda, aho hagaragajwe ko gukoresha telefoni utayifashe mu ntoki bitabarwa nk’ikosa nk’uko Umushinga w’iteka rishya rya Minisitiri ufite ikoreshwa ry’imihanda mu nshingano ingingo yaryo 156 ibiteganya.
Perezida wa Komisiyo Ububanyi n’Amahanga, Ubutwererane n’Umutekano, Depite Tumukunde Hope Gasatura, yavuze ko kuvugira kuri telefoni utayifashe mu ntoki nta kibazo kirimo.
Mu kubitangaho umucyo, Minisitiri w’Ibikorwaremezo, Dr. Jimmy Gasore yagaragaje ko iri tegeko rizajya rihana umuntu utwara ibinyabiziga afashe telefone mu ntoki, agenda areba amashusho cyangwa yayishyize ku gutwi.
Yagize ati: “Utwara ikinyabiziga ari gukoresha telefoni yandika, asoma, akoresha telefoni ayifatiye ku gutwi, areba amashusho cyangwa ibindi birangaza aba akoze ikosa. Ni ukuvuga ngo itegeko ryashyize imbaraga mu by’ukuri ku byatuma ugira impanuka.”
Yakomeje agaragaza ko mu gihe utwaye ikinyabiziga avugira kuri telefone yashyize muri ‘loud speaker’ cyangwa yayihuje n’imodoka agenda ayivugiraho, icyo gihe nta kosa, ati: “Mu gihe telefoni irambitse hasi, ihujwe n’imodoka ntabwo byitwa ikosa, bibarwa nk’aho waba ari kuganira n’umuntu mwicaranye mu modoka. Ndagira ngo mbitangeho umucyo.”
Polisi y’u Rwanda ihora ishishikariza abakoresha umuhanda kwitwararika kugira ngo hirindwe impanuka za hato na hato by’umwihariko iziterwa n’uburangare, ubusinzi, umuvuduko ukabije n’ibindi. Ibi binagera ku rwego polisi ikora ubukangurambaga bwa “Turindane”, “Gerayo amahoro” na “Tunywe Less”.
Kwirinda gukoresha telefone utwaye ikinyabiziga ni imwe mu ngingo ikunzwe kugarukwaho n’uru rwego mu gihe hari gukorwa ubu bukangurambaga.
Iryo teka rishya kandi riteganya ko abashoferi bazajya bakora amakosa bazajya banakurwaho amanota nk’aho mu gihe umushoferi akoze impanuka agahunga, azajya akurwaho amanota atandatu, uwatwaye imodoka ishyirwamo akuma kagaragaza igipimo cy’umuvuduko ‘Speed Governor’ ntagakoreshe, azajya ahanishwa gukurwaho amanota atanu,
Umushoferi utwaye ikinyabiziga yanyoye ibisindisha cyangwa ibiyobyabwenge azajya akurwaho amanota ane, gutwara ikinyabiziga udafitiye uruhushya, kurenza umuvuduko no kwirengagiza ibimenyetso birimo n’amatara azwi nka ’Feux Rouges’ azajya akurwaho amanota atatu mu gihe gutwara ikinyabiziga kidafite ubwishingizi cyangwa gukoresha telefoni utwaye hazajya hakurwaho amanota abiri.
Mu myaka ine ishize, Polisi y’u Rwanda yatangaje ko nibura impanuka zo mu muhanda zimaze guhitana abasaga 2,900 mu mpanuka zirenga ibihumbi 41 zabaye.
Mu mwaka wa 2024-2025, imwe mu mibare igaragazwa na Polisi y’u Rwanda y’ibihano ku byaha bakoze mu muhanda igaragaza ko abantu 409,148 barengeje umuvuduko batwaye ibinyabiziga; mu gihe 94,843 bafashwe batwaye imodoka barangaye.
