Ubuyobozi bw’Akarere ka Gatsibo buvuga ko gahunda yo kororera mu biraro yatanze umusaruro, aho aborozi bashishikarizwa guhinga ubutaka bwororerwaho ku kigero cya 70% ubwatsi n’ibihingwa byunganira ibiryo by’amatungo birimo ibigori, soya n’ibindi byagize uruhare runini mu kongera umusaruro w’amata, aho wavuye kuri litiro ibihumbi 45 ukagera kuri litiro ibihumbi 60 ku munsi mu mwaka wa 2025-2026.
Ibi ubuyobozi bw’Akarere ka Gatsibo burabigarukaho mu gihe umusaruro w’amata muri uyu mwaka ari litiro zigera kuri 25,437,000.
Ni mu gihe mu mwaka wari wabanje umusaruro w’amata wari litiro 22,413,190.Kuri ubu muri aka karere ka Gatsibo habarurwa abarozi babikora kinyamwuga bagera kuri 668 ndetse n’amakusanyirizo y’amata agera kuri atanu aharizwamo umusaruro w’amata uvuye mu mirenge itandukanye igize aka karere.
Umuyobozi w’Akarere ka Gatsibo ushinzwe iterambere ry’ubukungu Sekanyange Jean Leonard avuga ko uburyo bwo guhinga ku kigero cya 70% by’ubutaka bworerwaho bugahingwaho ubwatsi n’ibihingwa byunganira ibiryo by’amatungo, byakemuye ikibazo kibura ry’ibiryo by’amatungo cyane cyane mu gihe cy’izuba kuko aborozi bigishijwe uburyo bwo guhunika ibiryo by’amatungo igihe kirekire ari nabyo bituma umusaruro w’amata wiyongera.
Aragira ati: “ Kugira ngo umukamo wiyongere ni uko tuba twabonye icyororo cyiza k’inka ndetse twabonye n’ubwatsi bugaburirwa amatungo ndetse n’amazi ahagije, twashishikarije aborozi guhinga ubutaka bwabo bworererwaho ku kigero cya 70% kugira ngo babone ibyo kurya bihagije by’amatungo, kuri ubu tukaba tudafite ikibazo cy’ibiryo by’amatungo, ibyo rero bikaba byarazamuye umukamo aho mu myaka ibiri ishize twarabonaga litiro ibihumbi 45 ku munsi, ariko kuri ubu tugeze kuri litiro bihumbi 60 ku munsi, biturutse muri ubwo buryo bwo kongera ubwatsi bw’amatungo, twafashije aborozi kandi kubona amazi ahagije yo kuhira, aho twacukuye damu zigera ku 10 byose bifasha kuzamura ingano y’umusaruro w’amata tubona.”
Bamwe mu borozi baganiriye na MUHAZIYACU bavuga ko uburyo bwo kororera mu biraro butanga umusaruro bitandukanye n’uko inka zirirwaga ziruka ku misozi byagera mu gihe cy’izuba zikicwa n’inzara.
Munyaburanga Emmanuel ni umworozi wa kijyambere wo mu Murenge wa Rwimbogo, aragira ati: “Uburyo bwo kororera mu biraro ni bwiza kuko bituma inka zitirirwa zirukanka ku musozi zigataha zananiwe, ikindi ni uko mbere byageraga mu bihe by’izuba ubwatsi bukabura bigatuma inka zicwa n’inzara, ariko kuri ubu aho twatangiye guhinga ahari amafamu 70% byaho tubona uburyo bwo kubona ubwatsi buhagije tukabona n’uburyo bwo kubika ubwatsi tuzagabura mu gihe kirekire no muri cya gihe cy’izuba.”
Muri rusange muri uyu mwaka wa 2025-2026 mu karere ka Gatsibo habarurwa inka zigera 71,483.
