Ubuyobozi bw’Akarere ka Gatsibo bwibukije abatuye muri aka karere ko siporo ari ingenzi ku buzima bw’umuntu by’umwihariko abagore n’abakobwa, kuko ari bo bafite ibyago biri hejuru byo kugira ingaruka ziva ku kudakora imyitozo ngorora mubiri.
Ibi byagarutsweho mu gitondo cyo kuri iki Cyumweru tariki ya 2 Kamena 2024, ubwo hakorwaga siporo rusange y’abagore yateguwe n’abagore bo mu Karere ka Gatsibo.
Ni siporo yari igamije kuzirikana uruhare rw’umugore mu iterambere ry’Igihugu mu myaka 30 ishize, no gufatanya n’abandi mu kurema u Rwanda bifuza bashyira imbere kugira buzima buzira umuze.
Umuyobozi w’Akarere ka Gatsibo, Gasana Richard, yagaragaje ko siporo ikwiye gushakirwa umwanya mu buzima bwa muntu kugira ngo umubiri umere neza.
Yagize ati: “Siporo ni ingenzi kandi ni ubuzima, rero kugira ngo umuntu abeho neza kandi igihe kinini n’uko umubiri ukora siporo, byibura iminota 30 ku munsi.”
Meya Gasana kandi yashimiye abagore bateguye iyo siporo, ati: “Turashimira abagore b’u Rwanda batwibukije ko umubiri tuvuga tugomba kuwufata neza tukawusigasira.”
Dr. Confiace Cyubahiro, umuganga ku Bitaro bya Kiziguro yasobanuye uko siporo ari ingenzi cyane ku mugore.
Ati: “Siporo ni ingezi ku buzima bw’abantu by’umwihariko abagore n’abakobwa, ku mubiri wabo ni ingenzi kuko imisemburo yabo igenda ihindagurika buri kwezi ndetse n’abagana mu gihe cyo gucura hakaba iyimanuka ku rwego rwo hasi, akaba afite ibyago byo kurwara indwara zitandura akaba ari yo mpamvu hakenewe siporo ngorora mubiri.”
Dr. Cyubahiro yavuze ko ubushakashatsi bugaragaza ko umwe mu bagore batatu badakora siporo ihagije, avuga ko kandi umugore agomba gukora siporo kuko ari we ugira ingaruka nyinshi ziterwa no kudakora siporo.
Bamwe mu bagore bitabiriye iyo siporo babwiye MUHAZIYACU ko icyo gikorwa bakishimiye.
Mukayiranga Jeanette ati: “Uyu munsi siporo yanshimishije kuko ntawo narinzi ko nakunama nkunamuka vuba vuba, ubu ndumva umugongo umeze neza, nasanze gukora siporo ari urukingo rwaturinda indwara zitandura zigiye zitandukanye. Guhera ubu niyemeje gukora siporo gatatu mu cyumweru.”
Uwukuri Claudette na we ati: “Muri njye ndumva hari icyahindutse ku mubiri wanjye, mu byo nungukiye hano namenye ko gukora siporo birinda umubiri kurwara indwara nk’umutima, umuvuduko w’amaraso n’imitsi n’izindi. Numvise ko gukora siporo kenshi ikurinda kurwara izo ndwara zose.”
Nyuma ya siporo hapimwe ku bushake indwara zitandura zirimo umutima, umuvuduko w’amaraso, indwara z’ubuhumekero n’izibindi kugira ngo uwipimishije amenye uko ubuzima bwe buhagaze.
Ubuyobozi bw’Akarere ka Gatsibo bwaboneyeho no kwibutsa abitabiriye iyo siporo ko bagomba kwitegura neza amatora ya Perezida wa Repubulika n’ay’Abadepite ateganyijwe tariki ya 15 Nyakaga 2024, abasaba kuzatora neza bakirinda gutora imfabusa kandi bakazatora umuntu uzabagirira akamaro.
