Minisitiri w’Ubuzima Dr Ngamije Daniel yasobanuye ko ubwiyongere bw’ubwandu bwa Covid-19 ari yo mpamvu ya mbere mu zashingiweho hongerwa iminsi itanu ya Guma mu rugo, yiyongera ku yindi 10 yari yarashyizweho nk’imwe mu ngamba zo kwirinda icyorezo cya COVID-19.
Ibipimo byashyizwe ahagaragara mu kiganiro cyatambutse kuri RBA kuri iki Cyumweru, Minisiteri y’Ubuzima yatangaje ko mu minsi irindwi ishize byerekanye ko Umujyi wa Kigali n’uturere umunani twashyize muri Guma mu rugo habonetse abanduye Covid-19 basaga ibihumbi 48.
Ni nyuma y’itangazo Ibiro bya Minisitiri w’Intebe byanyujije kuri Twitter kuri iki Cyumweru, tariki 25 Nyakanga rigira riti: “Mu rwego rwo kurushaho gushimangira intambwe nziza imaze guterwa mu kugabanya umubare w’abandura Covid-19 ndetse n’abahitanwa na yo, Guverinoma yongereye iminsi itanu ku gihe cyo gushyira mu bikorwa ingamba zisanzweho, ni ukuvuga guhera tariki ya 27 kugeza ku ya 31 Nyakanga 2021.”
Ingamba zaherukaga gushyirwaho zigomba gukomeza gukurikizwa ni izashyizweho tariki 14 Nyakanga zarimo gushiriraho ‘Guma mu rugo’ ku bo mu Mujyi wa Kigali no mu turere twa Burera, Gicumbi, Kamonyi, Musanze, Nyagatare, Rubavu, Rwamagana na Rutsiro; kubera ubwiyongere budasanzwe bwa Covid-19, na Guma mu Karere ku batuye mu tundi turere.
Izo ngamba zagombaga kubahirizwa kuva tariki 17 Nyakanga, zikamara iminsi 10, ari yo yongereweho iminsi.
Kuri iki Cyumweru Minisitiri w’Ubuzima Dr Ngamije Daniel yasobanuye ko kongera iyi minsi y’ingamba zashyiriweho kwirinda Covid-19 byashingiye ku bwiyongere bw’ibipimo by’abanduye byagaragaye mu minsi irindwi yari ishize.
Yagize ati: “Utubuye ishusho ntoya ukayitubura ku rwego rw’Umujyi wa Kigali wose, bikwereka ko twari dufite nibura abantu ibihumbi 40 bafite ubwandu bwa Covid-19, bivuze ko ikibazo cyari gihari kandi kiri mu tugari twose.”
Ubushakashatsi bwakozwe nyuma y’iminsi irindwi hafatwa ibipimo byinshi bwagaragaje ko mu Mujyi wa Kigali ijanisha ry’abanduye rikiri hejuru, nyuma y’icyumweru hashyizweho gahunda ya Guma mu rugo kuko ubu Gasabo iri kuri 4.4%, Nyarugenge 3.8%, naho Kicukiro 3.8%
Minisiteri y’Ubuzima ivuga ko igihe ijanisha ryaba riri munsi ya 3% aribwo haba hari icyizere cy’uko icyorezo kitakomeza kuzahaza Igihugu cyane.
Minisitiri Dr. Ngamije akomoza ku cyitezwe kuri iyi minsi itanu yongereweho yagize ati: “Twe turumva ko muri iyi minsi itanu iri imbere imibare yongera kumanuka, abantu bubahirije amabwiriza.”
Yongeyeho ati: “Hari abo ugasanga bari gukina amakarita umunsi wose, bicaye batambaye agapfukamunwa, ari benshi, urumva ko abo ntabwo baba bari kubahiriza amabwiriza. Guma mu rugo ni guma mu rugo ntabwo ari ukujya mu isibo utembera, utambaye agapfukamunwa, utubahiriza amabwiriza, abatayubahiriza nibo bazatugumisha mu bibazo.”
Mu tundi turere umunani natwo twashyizwe muri Guma mu rugo ibipimo byafashwemo bigaragaza ko Rwamagana ari yo yagize ubwanduku ku ijanisha ryo hejuru kuko mu bantu 21,524 bapimwe habonetsemo abanduye 1,275, ijanisha ku banduye rikaba ari 5.9%,
Akarere ka Kamonyi mu bipimo 23,365 byafashwe, hagaragayemo abanduye 1,302, ijanisha ku bandura rikaba riri kuri 5.5%. Burera hapimwe 17,840 habonekamo abanduye 983, ijanisha ku banduye ni 5.4%, i Nyagatare mu bipimo 32,442, byagaragayemo abanduye 1,668 n’ijanisha ku banduye rya 5.1%, mu Karere ka Gicumbi ahafashwe ibipimo 26,256 habonetsemo abanduye 1,108 ijanisha rikaba kuri 4.2%.
Naho mu Karere ka Musanze mu bipimo 17,679 habonekamo abanduye 701, ijanisha ku bandura 4.0%, i Rutsiro mu bipimo 22,518 byafashwe, abanduye bagaragaye ni 622 n’ijanisha ry’abandura riri kuri 2.8%, mu gihe muri Rubavu ibipimo 27,331 byafashwe habonetsemo abanduye 461 ijanisha ku bandura rikaba 1.7%.
