Mu nkengero z’Ikiyaga cya Mugesera, mu Mudugudu wa Rwamibabi mu Kagari ka Ntovi, no mu nkengero z’umugezi w’Akagera, hombi mu Murenge wa Rukumberi mu Karere ka Ngoma habonetse imibiri 44 y’abazize Jenoside yakorewe Abatutsi.
Ku makuru yatanzwe n’abaturage, tariki 27 Kanama habonetse imibiri itanu, indi 42 iboneka tariki 2 Nzeri mu nkengero za Mugesera.
Indi mibiri ibiri yabonwe n’uwabumbaga amatafari mu nkengero z’umugezi w’Akagera, mu Mudugudu wa Bare mu Kagari ka Rwintashya.
Mbarushimana Ildephonse, Umunyamabanga Nshingwabikorwa w’Umurenge wa Rukumberi, yagize ati: “Nkuko mubizi imyaka 26 ishize ntabwo twakagombye kuba tugifite imibiri itaraboneka ngo ishyingurwe, nubundi byose tubikesha amakuru agenda atangwa n’abaturage. Ni amakuru yatanzwe, tujyayo kuyishaka turayibona, ariko n’ubundi iki gikorwa kiracyakomeje. Ntabwo turasoza.”
Gitifu Mbarushimana avuga ko nyuma y’imyaka 26 imibiri y’abazize Jenoside itakabaye ikiboneka ahubwo yakabaye yarashyinguwe yose, asaba ubufatanye bw’amakuru kugira ngo hamenyekane isigaye aho iri hose kugira ngo ishyingurwe mu cyubahiro.
Imibiri yabonetse yose yajyanywe ku rwibutso rwa Rukumberi aho izatunganyirizwa, nyuma ikazashyingurwa mu cyubahiro mu ahasanzwe ashyinguye imibiri isaga ibihumbi 40 y’abazize Jenoside yakorewe Abatutsi.
Musafiri Jean Pièrre,Uhagarariye umuryango uharanira inyungu z’abarokotse Jenoside yakorewe Abatutsi, IBUKA- mu Karere ka Ngoma yabwiye MUHAZIYACU ko no kuri uyu wa Kane ibikorwa byo gushakisha imibiri y’abazize Jenoside bashobora kuba barajugunywe ahantu hatandukanye mu Murenge wa Rukumberi bikomeje.
Avuga kandi ko kubera ibimenyetso bimwe byangiritse kubera imyaka myinshi ishize, kugeza ubu nta muntu urabasha kumenya umuntu we, azi, uri muri aba 49 babonetse.
Naho ku bijyanye no kuba nyuma y’imyaka 26 Jenoside yakorewe Abatutsi ihagaritswe hakigaragara imibiri hirya no hino itarashyingurwa, Musafiri avuga ko nubwo bishimisha ku rundi ruhande binababaza.
Ati: “Iyo tubonye imibiri tuba twumva twishimye, ariko nanone kubihoramo tutazi niba abantu bacu koko twarabashyinguye bitwereka yuko imbabazi zisabwa, umuntu uzisaba azi aho yashyize abantu ariko ntahavuge, ziba zisabwa ku munwa gusa ariko ku mutima tuba tubona ari ibya nyirarureshwa…. Turasaba umuntu wese waba uzi aho imibiri yajugunywe aduhe amakuru, tuyishake, tuyikureyo, tuze tuyishyingure mu cyubahiro.”
