Umubyeyi witwa Muhawenimana Janvière wari utuye mu Murenge wa Rurenge, mu Karere ka Ngoma yishwe aciwe umutwe, kuri uyu wa 12 Gicurasi. Hatangiye iperereza ku bagize uruhare mu rupfu rwe.
Amakuru agera kuri MUHAZIYACU agaragaza ko byabereye mu Kagari k’Akagarama, mu Mudugudu wo Mukibimba, bikamenyekana mugitondo cyo kuri uyu kabiri tariki ya 12 Gicurasi 2020.
Umunyamabanga Nshingwabikorwa w’Umurenge wa Rurenge Mapendo Gilbert yabwiye MUHAZIYACU uko aya makuru yamenyekanye.
Yagize ati: “ Ni byo hari umuturage wacu wishwe, witwa Muhawenimana Janvière w’imyaka 29, twabimenye agahana saa moya za mugitondo, tubibwiye w’umuturage uhafite umurima ubwo yari agiye guhinga. Yageze mu murima we asanga yabuze igitoki, bari bagitemye ariko abona amabere y’igitoki, arakurikira areba uko bimeze, akigera imbere abona amaraso, arazamuka ahageze nibwo yabonye uriya mudamu bamwishe bamuca umutwe.”
Gitifu Mapendo avuga ko ubugome bwakoze bukabije ndetse hagishakishwa umutwe wa nyakwigendera kuko uyu munsi wije utaraboneka.
Ati: “ Ni ikibazo gikomeye kandi kibabaje, ni ubwicanye ariko burimo n’ubushinyaguzi. Umutwe we ntabwo wagaragaye, twawushakishije umunsi wose ariko bwije tutawubonye, … umurambo wajyanywe ku bitaro Bikuru bya Kibungo, … ariko ejo tuzakomeza gushakisha kugira ngo hatazabaho gushyingura igihimba gusa.”
Ngo umuturage wabonye bwa mbere nyakwigendera Muhawenimana Janvière, yihutiye kumenyesha amakuru Ubuyobozi bw’umudugudu, binamenyeshwa izindi nzego.
Ubuyobozi bw’Umurenge wa Rurenge busobanura ko amakuru akimenyekana yamenyeshejwe ubuyobozi bw’Akarere n’inzego z’umutekano, hakaba na bamwe mu bantu bakekwa bafashwe bari gukurikiranwa mu nzego z’iperereza.
Ubuyobozi kandi buvuga ko bwihutiye ndetse bukomeje kwihanganisha Abanyarurenge, by’umwihariko umuryango wa Muhawenimana Janvière kuko nubwo yari umubyeri w’abana babiri, yari afite ababyeyi bombi mama na papa ari na bo yabanaga nabo; no gusaba abaturage ubufatanye mu kumenya, kugaragaza no gushyikiriza ubutabera abagize uruhare mu rupfu rwa Muhawenimana.
