Urugaga rw’Abikorera (PSF) mu Karere ka Ngoma rufatanyije n’ubuyobozi bw’akarere n’inzego z’umutekano barasaba abikorera kuzirikana ko icyorezo cya Covid-19 gihari kandi ko ingamba zo kukirwanya zikwiye kubahirizwa.
Igikorwa cy’ubukangurambaga ku rwego rw’akarere cyabereye mu Murenge wa Kibungo (ahazwi nko mu mujyi wa Ngoma) ubwo hasurwaga abikorera batandukanye biganjemo abacuruzi bo mu maduka, abakorera mu isoko ndetse n’abamotari n’abashoferi bakorera muri gare, ni ibikorwa byabaye kuri uyu wa 24 Ukuboza.
Ubuyobozi bw’Urugaga rw’Abikorera (PSF) mu Karere ka Ngoma busobanura impamvu bwahisemo iki gikorwa, nkuko bivugwa na Hitimana Vedaste, Visi Perezida wa PSF Ngoma.
Yagize ati: “Iyi minsi mikuru n’ubukangurambaga turabihuza cyane kuko niyo mpamvu twatangiye ku munsi ubanziriza Noheri ni ukugira ngo abantu binjire mu minsi mikuru ariko banafite ubwirinzi, banamenya ko kwikingiza bikomeje, ndetse tunakangurira abatarikingiza kugira ngo bikingize”
Intero y’ubu bukangurambaga igira iti “Warikingije?” ndetse nibwo butumwa bwahabwaga abikorera kugira ngo bibutse ababagana kwirinda icyorezo cya Covid-19 ari na ko bafata inkingo dore ko Leta y’u Rwanda yakoze ibishoboka byose inkingo zikegerezwa abaturage,
Nko mu isoko rya Ngoma hari abakorerabushake bagenzura ko abantu bafashe inkingo zose utarazuzuza yerekwa aho ajya gufatira urukingo, akabona gukomeza ibyari bimuzanye.
Hari umwe mu baturage wari ugiye gutega imodoka imutwara i Kayonza, mbere yo kwinjira mu modoka yemeye kuganira n’umunyamakuru wa MUHAZIYACU, yagize ati: “Naje gutega kuko nzi ko nikingije kandi mu giturage n’abandi bose barabizi ko utarikingije inkingo zombi ntaho akwiye kujya, ntibikuraho ko dukwiye kwirinda kuko na n’ubu turasabwa gukaraba intoki neza tukambara agapfukamunwa neza, tukirinda guhura turi abantu benshi n’aho duhuriye tugashyiramo intera.”
Umuyobozi w’Akarere ka Ngoma Niyonagira Nathalie na we wifatanyije n’abikorera muri ubu bukangurambaga yabibukije ko icyorezo cya Cocid-19 ntaho cyagiye, abasaba gukomeza kubahiriza amabwiriza yashyizweho.
Yakomeje agira ati: “Inyungu twiteze muri iki gikorwa ni uko Abikorera.. ni abantu bari hose ni ubuzima bw’abaturage; abikorera iyo ubwandu bwabaye bwinshi barahazaharira kuko ingamba zirakazwa ibikorwa bimwe na bimwe bigafunga, ariko ntabwo ari cyo twifuza, turifuza ko nk’abafatanyabikorwa nabo babyinjiramo bagakangurira abaturage kwikingiza.”
Ubuyobozi bw’Akarere ka Ngoma burasaba abaturage kutirara ngo muri iyi minsi mikuru bishime barenge ku ngamba zafashwe zishobora gutuma ubwandu bwiyongera.
Ubukangurambaga bumeze butya burakomeza gukorwa mu mirenge yose igize Akarere ka Ngoma, abikorera bakaba biyemeje ko iyi minsi mikuru izarangira abaturage bose babagana barikingije.
