Hirya no hino mu turere tugize Intara y’Iburasirazuba habereye umuhango wo gusoza Urugerero rw’Intore z’Inkomezabigwi icyiciro cya 9 rwatangiye ku taliki ya 14 Werurwe kugeza ku ya 25 Gicurasi 2022.
MUHAZIYACU yabakusanyirije inkuru y’uko tumwe mu turere twaserutse muri uyu muhango.
Nyagatare: Ibikorwa by’urugerero byahawe agaciro ka Miliyoni 100FRw
Mu Karere ka Nyagatare urubyiruko rwitabiriye urugerero rw’Inkomezabigwi icyiciro cya 9 ni 822 (abahungu 498 n’abakobwa 324).
Nk’uko byemezwa n’Akarere ibikorwa bitandukanye byakozwe ku rugerero bifite agaciro ka FRW 110,067,000; birimo kubakira no gufasha abatishoboye, gutunganya ibikorwaremezo no kubungabunga ibidukikije, kongera isuku, kurwanya imirire mibi, gusubiza abana mu ishuri n’ubundi bukangurambaga.
Ku rwego rw’Akarere uyu muhango wabereye mu Murenge wa Karama, aho uyu murenge wanashyikirijwe inka y’ubumanzi kubera ibikorwa by’indashyikirwa, ni umuhango witabiriwe n’Umuyobozi w’Akarere ka Nyagatare Gasana Stephen.
Kuva mu kwezi kwa Werurwe uyu mwaka, uru rubyiruko rwari ku rugerero mu bikorwa byo gukemura ibibazo bibangamiye umuryango; bakaba barubatse inzu z’abatishoboye 42, bavugurura inzu 93,batunganya imihanda ireshya na Km 25, bakora imiyoboro y’amazi km 7 n’uturima tw’igikoni 280, batera ibiti by’imbuto ziribwa 1400 n’ibindi bikorwa byo gufasha abatishoboye n’ubukangurambaga.
Uretse imirimo y’amaboko n’ubukangurambaga kuri gahunda za Leta zitandukanye,uru rubyiruko rwigishijwe indangagaciro na kirazira z’umuco Nyarwanda n’intambwe y’intore y’ingabo nziza n’iya mutima w’urugo.
Umuyobozi w’Akarere ka Nyagatare Gasana Stephen yagize ati: “Uru rugerero rwabaye umwanya wo kwicara no kwibukiranya indangagaciro n’umuco nk’Abanyarwanda, ubufatanye no kujya inama kuko ubumwe bwacu ni zo mbaraga zacu.
Nkaba nshimira uru rubyiruko ku musanzu warwo mu kwiyubakira Igihugu n’ibikorwa bifasha abandi bakoze.”
Rwamagana: Abasoje urugerero bahawe umukoro wo kuba intangarugero
Mu Karere ka Rwamagana naho hasorejwe urugerero, ku rwego rw’akarere byabereye mu Murenge wa Rubona, urubyiruko rwitabiriye rukanasoza urugerero rw’Inkomezabigwi ni 608.
Umuyobozi w’Akarere ka Rwamagana Mbonyumuvunyi Radjab yibukije abasoje urugerero ko hanze hari byinshi bibategereje harimo ibyiza n’ibishuko byinshi byabashora mu bibi.
Meya Mbonyumuvunyi yakomeje agira ati: “Umubare munini w’abaturage dufite ni urubyiruko rimwe na rimwe turubona rwishora mu ngeso mbi, n’ibikorwa by’urukozasoni nko kunywa ibiyobyabwenge, gutwita inda zitateguwe, ubujura n’ibindi, aba rero tubitezeho kuzababera urugero rwiza bakabigisha indangagaciro na kirazira nk’uko nabo babitojwe.”
Kirehe: Umurenge wahize iyindi wahawe inka y’ubumanzi
Urugerero rw’Inkomezabigwi 9/2022
mu Karere ka Kirehe abitabiriye urugerero bose hamwe ni 541 barimo abasore 301 n’abakobwa 240, ubuyobozi bw’Akarere bwashimiye Inkomezabigwi zitabiriye urugerero kandi bunashima ibikorwa bakoze.
Urugerero rwasorejwe mu Murenge wa Gahara, Akagari ka Rubimba, iki gikorwa cyo gusoza urugerero rw’ Inkomezabigwi cyitabiriwe n’ Umuyobozi w’Akarere wungirije ushinzwe imibereho myiza Mukandayisenga Janvière, inzego z’ umutekano, Abakozi b’ Akarere n’Umurenge, Abatoza b’ Urugerero n’ Intore zarwitabiriye.
Muri uyu muhango hashimiwe Umurenge wa Gahara ku bikorwa by’ ubudashyikirwa wagaragaje ku rugerero ukaba wahawe inka y’ ubudashyikirwa ifite agaciro k’ amafaranga ibihumbi 600FRw habariwemo imiti n’ ubwishingizi. Hashimiwe kandi intore yabaye Indashyikirwa ku rugerero Mukaniyonsenga Primitive washyikirijwe ingororano yo kuba yaritwaye neza ku rugerero, ndetse Inkomezabigwi zakoze urugerero neza kandi zitwaye gitore zahawe icyemezo (Certificates).
Mu butumwa bwatanzwe
n’Umuyobozi w’ Akarere wungirije ushinzwe imibereho myiza Mukandayisenga Janvière yabasabye gukomeza kwitwara neza kandi gitore, gukomeza gukorana n’ inzego z’ Ubuyobozi mu bikorwa byo gukemura ibibazo bibangamiye imibereho myiza y’ abaturage, kwimakaza ikoranabuhanga no kurikoresha neza, gukomeza kwitabira ibikorwa by’ ubukorerabushake mu rwego rwo kwimakaza indangagaciro yo kwigira, kwihesha agaciro, guteza imbere imibereho myiza y’ abaturage n’ Igihugu muri rusange.
Ibi byose byakubiwe mu ntero igira iti: “Duhamye Umuco w’Ubutore ku Rugerero rwo Kwigira”
Kayonza: Intore zishoje Urugerero zasabwe gukunda Igihugu
Mu Karere ka Kayonza kimwe n’ahandi hose mu Gihugu hashojwe urugerero rw’Inkomezabigwi icyiciro cya 9/2022, ku rwego rw’Akarere rwasorejwe mu Murenge wa Rukara nk’umurenge wabaye Indashyikirwa ku rugerero.
Bimwe mu bikorwa byakozwe ku rugerero bijyanye no guteza imbere imibereho myiza y’abaturage.
Uyu muhango witabiriwe n’umuyobozi w’Akarere wungirije ushinzwe imibereho myiza y’abaturage Harelimana Jean Damascène, mu butumwa yagejeje kuri izi ntore yagarutse ku myitwarite ikwiye kuranga uru rubyiruko,
Yakomeje agira ati: “Turashima mwe mushoje urugerero umurava mwagize mu kwiyubakira Igihugu mwubakira abatishoboye amacumbi, ubwiherero n’ibindi, turabasaba kwirinda ibiyobyabwenge, inda z’imburagihe n’ubujura.”
Ngoma: Intore zirasabwa gukomeza kwitwara gitore
Ibikorwa byo gusoza urugerero mu Karere ka Ngoma naho byabereye hirya no hino mu mirenge aho ubutumwa bwatanzwe bwagarutse ku myitwarire ikwiye kuranga intore ishoje urugerero.
Mu Nurenge wa Rukira habaye igikorwa cyo gusoza urugerero rw’Inkomezabibwi rwa 9/2022.
Ni igikorwa cyitabiriwe cyaranzwe
n’akarasisi, intambwe y’Intore, no gutanga ibyemezo byo gutozwa.
Wabaye umwanya wo gushimira intore uko zitwaye ku rugerero bashishikarizwa gukomeza kurangwa n’umuco wa gitore.
Naho mu Murenge Gashanda, ku biro by’umurenge niho habereye igikorwa cyo gusoza urugerero rw’inkomezabigwi icyiciro cya 9, mu ijambo rya Munyaneza Eric wari ahagarariye ubuyobozi bw’umurenge, yashimiye inkomezabigwi ku bikorwa byiza bagezeho n’imyitwarire myiza yabaranze, cyane cyane uruhare bagize mu gukemura ibibazo bibangamiye imibereho myiza y’abaturage.
