Abaturage bo mu Murenge wa Kiziguro mu kagari ka Ndatemwa baratozwa kugana iy’ubuhinzi buvuguruye bava muri gakondo yo kuvangavanga imyaka bitabaha umusaruro mwinshi, Mukamusonera Victoria ni umwe mu batanga ubuhamya bw’uburyo yari asanzwe ari mu cyiciro cy’abafashwa none umurima we ubu ukaba ari wo cyitegererezo mu buhinzi bwa kijyambere.
Mukamusonera Victoria ni umuturage ufite ubutaka buto, bwagizwe umurimashuri kugira ngo abaturage bo muri Ndatemwa bige uko nabo bakwigira kandi bahereye ku butaka bafite n’iyo bwaba ari buto.
Ubutaka bwa Mukamusonera ahangana n’ intambwe 20 kuri 20, muri iki gihembwe cya 2021B hahinzemo ibishyimbo ku buryo bwa kijyambere, biteye ku murongo.
Mukamusonera yabwiye MUHAZIYACU ko mbere y’uko atangira guhinga muri ubu buryo yari umuntu uhingira inkono ye gusa, ariko kuri ubu ngo hari icyo yabwira abandi bahinzi.
Yagize ati: “Iyi gahunda batwigishije nabonye ari nziza, uhinga ibishyimbo bitegeranye bikabasha gushisha, bikabasha gushoga cyane. Mbere twahingaga ibyegeranye bimwe bikaryamira ibindi, bikabora bigapfa, nicyo gituma nsaba abandi baturage kuyoboka ubu buhinzi bwa kijyambere.”
Uyu murimashuri uri muhanda, impamvu yo kuwushyira hafi y’aho abahisi n’abagenzi banyura ngo ni ukwereka ku buryo bworoshye, abaturage bandi ko ibyo babwirwa bishoboka kandi bikorerwa mu murima w’uwo bazi neza ko nta butaka bunini yagiraga, akaba kandi yari umukene bose bazi, ikiyongeraho ni uko uwo muturage bamuha umuganda wo guhinga ku buryo bwa kijyambere.
Mu rwego rwo gufasha abaturage kuva mu bukene aribo babigizemo uruhare kandi, hifashishijwe ibyo basanzwe batunze ahubwo bakerekwa uko babibyaza umusaruro, hari umufatanyabikorwa w’Akarere ka Gatsibo, wiyemeje gushyira muri gahunda imishinga nk’iyo yo gufasha abaturage kwikura mu bukene.
Umuyango Plan International Rwanda utera inkunga amashyirahamwe yo hirya no hino mu gihugu ni wo wateye inkunga aba bahinzi binyuze mu buryo bw’imirimashuri, binyuze mu mushinga wawo kuri ubu ukurikiranwa n’Urugaga Imbaraga, muri aka kagari ka Ndatemwa hatoranyijwe abaturage batandatu imirima yabo ihingwa mu buryo bwa kijyambere, ubu bakaba bategereje umusaruro.
