Mu ruzinduko Perezida w’Urukiko rw’Ikirenga yagiriye mu Karere Ka Bugesera ku Rukiko rw’Ibanze rwa Nyamata kuri uyu wa gatanu tariki ya 10 Nzeri, yavuze ko bikwiye ko abacamanza n’abandi bakozi b’Urukiko bakorera mu nyubako igendanye n’igihe ndetse bagahabwa n’ibikoresho bishya bibafasha mu kazi kabo ka buri munsi.
Iyi nyubako isa n’ishaje kandi nto ugereranije n’abakozi bakoreramo, itekerezwa kuhindurwa mu rwego rwo gukora neza imirimo y’ubucamanza uru Rukiko rw’Ibanze rwa Nyamata rushinzwe.
Nyuma yo kuganira na bamwe mu bakozi b’uru rukiko, Perezida w’Urukiko rw’Ikirenga Dr. Faustin Nteziryayo, yaganirije MUHAZIYACU ku cyari kigenderewe muri uru ruzinduko yagiriye muri aka Karere by’umwihariko kuri uru Rukiko rw’Ibanze rwa Nyamata.
Dr. Nteziryayo yavuze ko icyari kigenderewe ari ukurebera hamwe uko akazi k’ubucamanza kari kugenda, kuganira ku kibazo cy’inyubako ishaje kandi nto uru rukiko rukoreramo bityo rukaba rwabona indi nyubako ndetse n’ibikoresho bigendanye n’igihe.
Yagize ati: “Ni uruzinduko rugamije ngo turebe bagenzi bacu aho bakorera, tunaganire ku bijyanye n’imigendekere myiza y’akazi, ariko nanone icyari kigamijwe nk’uko mubibona hano hari inyubako y’Urukiko rw’Ibanze rwa Nyamata ubona itagenganye rwose n’akazi abacamanza n’abandi bakozi b’inkiko bagomba gukoreramo. Ubwo rero twagira ngo tubibone noneho kugira ngo dukomeze kugira ubuvugizi kugira ngo iyi nzu abacamanza bagenzi bacu bazabone aho gukorera hashobotse kandi bazabashe kutanga umusaruro Igihugu kibatezeho.”
Dr Nteziryayo ashimira Umukuru w’Igihugu wabatekerejeho kuko yumvise ibibazo bafite byo kugira ibikoresho bishaje kandi bitagendanye n’igihe.
Ati: “Ahubwo turashimira Nyakubahwa Perezida wa Repubulika kuko yumvise ibibazo dufite cyane cyane kugira ngo twihutishe ubutabera. Kugira ngo dutange ubutabera bwihuse kandi bunoze harimo no gukoresha ikoranabuhanga mu guca imanza no mu mirimo yindi y’inkiko. Aha rero turishimye kubera ko yashoboye kumva icyo kibazo noneho ubu n’inzego zatangiye kugikoraho”.
Inyubako nshya uru rukiko rwiteze, iri muri gahunda mu zigomba kubakwa kuko Minisiteri ibishinzwe yamaze kubiteganya mu ngengo y’imari, cyane ko n’ikibanza iyi nyubako izajyamo cyamaze kuboneka.
