Kuva ku wa Gatandatu tariki 11 Mutarama kugeza ku Cyumweru tariki 12 hirya no hino mu gihugu hakinwe imikino itandukanye, amwe mu makipe aturuka mu turere dutandukanye two mu Ntara y’Iburasirazuba yitwaye neza, andi yitwara nabi; bitewe nuko atabashije guha ibyishimo abafana bayo.
Duhereye mu makipe akina mu cyiciro cya mbere muri shampiyona y’umupira w’amaguru (Rwanda Premier League), amakipe abiri ahagarariye Intara y’Iburasirazuba muri iyi shampiyona yose ntiyahiriwe.
APR FC yatsinze Bugesera FC ibitego 2-1, Mukura inyagira Sunrise ibitego 4-1. Heroes ibarizwa mu Karere ka Bugesera ni yo yitwaye neza itsinda Etincelles igitego 1-0 nubwo yagumye ku mwanya wa nyuma.
Ibi byatumye Bugesera iguma ku mwanya wa Gatandatu n’amanota 23, mu gihe Sunrise yari iya cyenda yasubiye inyuma ho umwanya umwe, kuri ubu ni iya 10 n’amanota 20.
Icyiciro cya Kabiri abenshi bitwaye neza
Shampiyona y’Icyiciro cya Kabiri na yo yarakomeje aho bakinaga umunsi wa kane wayo, amakipe menshi yo mu Ntara y’Iburasirazuba yitwaye neza arangajwe imbere na Rwamagana City, ndetse na Etoile de l’Est yifuza kuzamuka nyuma yo kuzurizwa Sitade.
Rwamagana City yatsinze Vision J.N ibitego 2-1, Etoile de l’Est itsinda Miroplast ibitego 2-0, Kirehe FC yatsinzwe na Pepiniere FC ibitego 3-2, Nyagatare FC itsinda UR FC igitego 1-0, Akagera FC yatsinzwe na Intare FC igitego 1-0 na ho Rugende FC itsinda Alpha FC ibitego 2-1
Mu mikino y’intoki ya Volleyball, Ikipe ya Kirehe Volleyball Club yatsinzwe na REG amaseti 3-0 bituma ikomeza kuza ku mwanya wa nyuma n’ubusa bw’amanota. Ikipe ya IPRC Ngoma na yo ntabwo yorohewe na APR Volleyball Club kuko yayitsinze amaseti 3-0.
