Mu Kagari ka Bwiyorere mu Murenge wa Mpanga abaturage baho n’ubuyobozi barashimirwa ko besheje umuhigo wo gutanga mituweli y’umwaka wa 2021/2022 ku kigero cy’ijana ku ijana.
Iyi ni inshuro ya gatatu abaturage 5,973 bo mu Kagari ka Bwiyorere besheje umuhigo wa mituweli, ndetse ngo aba baturage batangira umwaka wa mituweli bararangije gutanga imisanzu yabo, ni igikorwa bafatanyamo n’ubuyobozi bubegereye.
Umunyamabanga Nshingwabikorwa w’Akagari ka Bwiyorere Habakubaho Francois Xavier akomeza avuga ibanga bakoresha, ati: “Ibanga ryadufashije mu kwesa umuhigo wa mituweli 100%, ni ubufatanye n’inzego zose zatowe haba abajyanama b’ubuzima, abikorera (PSF) ba Mutwarasibo ndetse n’abakorera bushake b’urubyiruko dukorera hamwe tugahuza imbaraga n’abaturage tuyobora, ikindi ni ukwibumbira mu bimina bya mituweli.”
Gitifu Habakubaho avuga ko mu kagari kabo harimo ibimina bya mituweli gusa 21, buri cyumweru umuturage yizigama bitewe n’ubushobozi bwe ndetse n’umubare w’abagize umuryango, ibi bimina biterana buri cyumweru.
Si aka kagari konyine kari kwesa umuhigo wa Mituweli, hari utundi tugari tubiri turi ku gipimo cya 85% by’abaturage bamaze gutanga mituweli, Akagari ka Kagese kari ku gipimo cya 96% ni ako mu Murenge wa Nasho, naho akagari ka gatatu ni aka Mpanga mu Murenge wa Mpanga, mu karere kose Umurenge wa Mpanga niwo uri mbere mu gutanga mituweli.
Mu muhango wo gushimira abahize abandi mu kwesa umuhigo wa mituweli, Guverineri w’Intara y’Iburasirazuba CG Gasana K. Emmanuel yashimiye abaturage n’abayobozi bo mu tugari twahize utundi, yakomeje agira ati: “Turabashimira ko mwagize ibakwe, mugira icyusa, mugira umuhate n’umurava cyane cyane mugusha ku ntego y’umuturage ugomba kwivuza, akagira ubuzima bwiza kandi bikabaraza ishinga ko umuturage muhagarariye atagomba kubaho adafite mituweli.”
Guverineri Gasana yakomeje avuga ko hari icyizere icy’uko ibyo bumvikanye n’abayobozi ko ku tariki 15 Kanama n’indi mirenge n’utugari bazaba barangije kwishyura mituweli, yunzemo ati “Turacyakomeza kubashimira tunababwira duti mukomeze mubere intangarugero Intara, kuko n’abandi bakwiye kuza kubigiraho kuko muhagaze neza mu guhuza abaturage n’inshingano mwahawe.”
Muri rusange Akarere ka Kirehe niko kari ku mwanya wa mbere gafite abaturage benshi mu ntara bamaze gutanga mituweli muri uyu mwaka wa 2021-2022 kuri ubu bari ku gipimo cya 85% mu baturage ibihumbi 412 babarizwa mu Karere ka Kirehe, iyi mibare ni iyatangajwe n’ubuyobozi bw’Akarere ka Kirehe.
