Urubyiruko rwari rwaracikirije amashuri mu Karere ka Nyagatare rwongeye guhabwa amahirwe yo gusubira kwiga binyuze muri gahunda ya RISE [Resilience in Secondary Education], igamije gufasha urubyiruko rutabashije gukomeza amashuri kongera kuyiga no kwiteza imbere.
Iyi gahunda ishyirwa mu bikorwa na Imbuto Foundation, yatangijwe ku mugaragaro kuri uyu wa 30 Werurwe 2026, mu kigo cya GS Nyagatare giherereye mu Murenge wa Nyagatare, aho hanatangiwe ibikoresho by’ishuri ku banyeshuri bayigiyemo birimo amakayi, amakaramu, Seti n’amarate; ndetse banahabwa amahirwe yo gukoresha mudasobwa ziboneka ku bigo bigiraho.
Kugeza ubu, abanyeshuri 617 ni bo bamaze kwiyandikisha, ariko biteganyijwe ko umubare wakiyongera kuko igikorwa cyo kwiyandikisha kigikomeje.
Bamwe mu baganiriye na MUHAZIYACU bavuze ko bishimiye ko Leta yongeye kubatekerezaho ikabaha andi mahirwe yo kwiga kugira ngo na bo bagire amahirwe yo kwiteza imbere.
Uwineza Julienne, utuye mu Murenge wa Rukomo, ufite imyaka 31 n’abana batatu, yavuze ko yishimiye cyane kongera kubona amahirwe yo kwiga nyuma yo kuba yari yaracikirije amashuri ageze mu mwaka wa kane w’amashuri yisumbuye.
Yagize ati: “Nkimara kumenya ko nahawe andi mahirwe yo kwiga byaranshimishije cyane. Ubu ngiye gushyiramo imbaraga kugira ngo ndebe ko nazabona buruse ya kaminuza nkiteza imbere.”
Mukagatare Liberata, ufite imyaka 32 utuye mu Murenge wa Nyagatare, yavuze ko iyi gahunda ije gukemura ikibazo cyari kimaze igihe kirekire cy’uko batabashaga gukomeza amashuri kubera ubushobozi buke, ati: “Hari hashize igihe kinini twarabuze ubushobozi bwo gusubira kwiga, gusa iyi gahunda iradufashije cyane kuko yongeye kuduha amahirwe yo kongera kwiga ndetse tukazanahabwa n’impamyabumenyi ku buryo twakomeza na kaminuza.”
Nsengiyumva Emmanuel w’imyaka 26, wari waragarukiye mu mwaka wa Gatanu w’amashuri yisumbuye, yavuze ko iyi gahunda ari igisubizo ku rubyiruko rwifuzaga kongera kwiga, ati: “Iyi gahunda iradufasha kubona amahirwe yo kongera kwiga, tukagira ubumenyi buzadufasha kwiteza imbere mu gihe kiri imbere.”
Umuyobozi w’Akarere ka Nyagatare wungirije ushinzwe imibereho myiza y’abaturage, Murekatete Juliet, yakanguriye abitabiriye iyi gahunda kuyibyaza umusaruro, abasaba kwiga bashyizeho umwete no kubaha amabwiriza bahabwa.
Yagize ati: “Turabasaba kubaha iyi gahunda mwazaniwe, mukirinda imyitwarire itari myiza, mukiga mushyizeho umwete kugira ngo muzahabwe impamyabumenyi kandi mubone n’andi mahirwe azabafasha mu buzima bwanyu.”
Biteganyijwe ko iyi gahunda izakorerwa mu mirenge yose uko ari 14 igize Akarere ka Nyagatare ndetse ikaba izamara imyaka 10, aho abanyeshuri bazajya biga mu gihe cy’amezi 6 bagakora ibizamini; abatsinze bagahabwa impamyabumenyi, mu gihe abatabitsinze bazahabwa amahirwe yo gusibira ari na ko hakirwa abandi bashya babyifuza.
Hari hashize amezi ane iyi gahunda itegurwa, aho hibanzwe ku gushaka no guhugura abarimu, gutoranya abaziga, gutegura aho bazigira ndetse no guteganya ibikoresho bizifashishwa mu myigire.
Muri rusange biteganyijwe ko iyi gahunda izagera mu Gihugu hose, Nyagatare hazafashwa abanyeshuri basaga ibihumbi 54 mu gihe cy’imyaka 10.
