Mu Karere ka Bugesera hatangijwe gahunda Nzamurabushobozi ku banyeshuri 37,874 biga mu bigo by’amashuri abanza mu rwego rwo kurushaho gukurikirana abanyeshuri bose bagize amanota ari munsi ya 50% kugira ngo bafashwe kwiga neza ngo bimuke.
Igikorwa cyo gutangiza iyi gahunda cyabaye kuri uyu wa Mbere tariki 27 Nyakanga 2026, gitangizwa ku mugaragaro n’Umuyobozi w’Akarere wungirije ushinzwe imibereho myiza y’abaturage, Imanishimwe Yvette.
Gahunda Nzamurabushobozi igenewe abanyeshuri biga mu mashuri abanza guhera mu mwaka wa Mbere kugera mu mwaka wa Gatanu batagejeje ku kigero kifuzwa hagendewe ku mfashanyigisho ishingiye ku bushobozi.
Minisiteri y’Uburezi(MINEDUC) ibinyujije mu rwego rw’ Igihugu rushinzwe Uburezi bw’Ibanze (REB) isaba abanyeshuri biga mu mashuri abanza ko iyi Gahunda Nzamurabushobozi yatangiye uyu munsi, tariki ya 27 Nyakanga izasozwa tariki 28 Kanama 2026.
Umuyobozi w’Akarere ka Bugesera wungirije ushinzwe imibereho myiza y’abaturage, Imanishimwe Yvette yasabye aba banyeshuri kwita ku masomo bagiye guhabwa no kurangwa n’imyitwarire myiza kugira ngo bizabafashe kubona amanota yo kwimukana n’abandi mu mwaka w’amashuri wa 2026-2027.
Yagize ati: “Turabasaba kuzakurikirana neza amasomo n’inyigisho muzahabwa muri iyi gahunda kugira ngo muzimukane n’abandi mu mwaka ukurikiraho. Turabasaba kandi kurangwa n’imyitwarire myiza kugira ngo uyu mwanya utazabapfira ubusa, ahubwo uzabafashe gukomezanya amasomo n’abandi banyeshuri mwiganaga mu mwaka umwe.”
Iyi gahunda izajya itangira saa mbiri za mu gitondo igeze saa sita z’amanwa (8:00 am-12:00 pm).
MINEDUC iributsa kandi ababyeyi bafite abo banyeshuri bavuzwe haruguru, kubohereza ku mashuri yabo kugira ngo bafashwe n’abarimu bazahasanga. Barasabwa kandi kubohereza mu gihe cyagenwe, bakirinda kubakoresha indi mirimo yatuma batitabira iyi gahunda ndetse no kubashakira iby’ingenzi umunyeshuri akenera mu myigire ye.
Mu Karere ka Bugesera, habarurwa abanyeshuri 37,874 bazitabira iyi gahunda nzamurabushobozi, barimo abahungu 16,680 n’abakobwa 21,194.
