Mu rwego rwo kurwanya Icyorezo cya COVID-19 u Rwanda rwakiriye inkunga y’ibikoresho n’inkingo byatanzwe na Leta Zunze Ubumwe z’Abarabu-UAE, kuri uyu wa Gatandatu tariki 24 Nyakanga 2021 i Kigali.
Mu butumwa bwanyujijwe ku rukuta rwa Twitter, Minisiteri y’Ubuzima yatangaje ko muri gahunda ikomeje yo kurwanya icyorezo cya Covid-19, uyu munsi Minisitri w’Ubuzima Dr. Ngamije Daniel yakiriye toni Icyenda z’ibikoresho byifashishwa mu buvuzi bigizwe n’ibitanda byo kwa muganga, ibikoresho byifashishwa mu guhumeka n’inkingo za COVID-19; byatanzwe na Guverinoma ya Leta Zunze Ubumwe z’Abarabu -UAE.
Ambasaderi wa UAE mu Rwanda Hazza Alqahtani ni we washyikirije Minisitiri w’Ubuzima w’u Rwanda Dr. Ngamije ibyo bikoresho n’inkingo ku kibuga cy’indege mpuzamahanga cya Kigali i Kanombe.
Mu rwego rwo gusuzuma no gufatira ingamba Icyorezo cya Covid-19 mu Rwanda, muri iki gihe imbaraga ziri gushyirwa mu gupima abantu benshi, gukingira, ntibisigane no gufata ingamba zikomeye zigamije gukumira ikwirakwizwa ry’icyorezo.
Ibipimo bitangazwa na Minisiteri y’ubuzima mu Rwanda byerekana ko kugeza ubu abantu hafi miliyoni ebyiri bamaze gupimwa Virusi ya Corona, muri bo abo byagaragaye ko banduye kugera kuri uyu wa Gatanu tariki 23 Nyakanga 2021 ni 62,328, muri abo abavuwe bagakira ni 44,739; mu gihe abamaze kwicwa n’iki cyorezo cya Covid-19 ari 718.
Abamaze guhabwa inkingo za Covid-19 mu Rwanda ni 423,182.
Naho kugeza kuri uyu wa Gatanu, abantu batangajwe ko barwaye Covid-19 hirya no hino mu Rwanda ni 16,871 barimo abarembye 71; mu gihugu hose ijanisha ku bandura rikaba ari 5.6%.
