Urubyiruko rwo mu Karere ka Rwamagana mu Murenge wa Kigabiro rwakoze urugendo rwo kwamagana ibiyobyabwenge ndetse runakina imikino ikangurira ababikoresha kubireka; nyuma yo kwerekwa uburyo ibihano byakajijwe.
Muri ubu bukangurambaga urubyiruko rwahawe ibiganiro n’abayobozi banyuranye barimo aba Polisi y’u Rwanda, Urwego rw’Igihugu rw’Ubugenzacyaha, RIB, n’abandi barwereka inzira nziza rukwiriye kugenderamo.
Iyi mikino n’uru rugendo byabaye mu mpera z’iki Cyumweru mu bukangurambaga bwateguwe n’itorero Zion Temple ku bufatanye n’Akarere ka Rwamagana. Bwari bufite insanganyamatsiko igira iti “ Turwanye ibiyobyabwenge, ubusinzi n’inda zitifuzwa dutere imbere.’’
Umushumba wa Zion Temple Paruwasi ya Rwamagana, Byishimo Augustin, yavuze ko bateguye ubu bukangurambaga bagamije kwihuza n’urubyiruko ruri hanze basanga imikino aricyo kintu cy’ingenzi cyabahuza, bakabereka ko ibiyobyabwenge nta cyiza cyabyo ko ahubwo bakizwa.
Ati: “Abenshi baba muri ibi biyobyabwenge ni abanyonzi n’urundi rubyiruko rutandukanye rero twarugezeho, rero amahirwe ya mbere bafite ni uko ari bato, ejo bazaba bashaje turabifuriza rero gukoresha ya mahirwe y’ubuto aho kuyashora mu biyobyabwenge.’’
Kwizera Honoré usanzwe akora akazi k’ubunyonzi, yavuze ko inama bungukiye muri ubu bukangurambaga ari uko ibiyobyabwenge ubinywa ndetse n’ubicuruza basigaye bahabwa ibihano bikomeye cyane ku buryo bagiye kugenda babirira abo bazi babikoresha.
Ati: “ Nzababurira mbabwire ko ibihano byikubye kenshi kuko natwe turifuza ko ababijyamo babireka.’’
Ishimwe Jean de Dieu we yagize ati: ‘‘Icyo ubu bukangurambaga bunsigiye ni uko namenye ko nanjye nagira uruhare mu kuburira ababinywa ndetse byanaba na ngombwa ngabagaragaza bakaburirwa n’izindi nzego kandi ndizera ko nzabikora.’’
Umuyobozi w’Akarere ka Rwamagana wungirije ushinzwe Iterambere ry’Ubukungu, Kagabo Rwamunono Richards, avuga ko ubu bukangurambaga bafatanyijemo na Zion Temple ubusanzwe bukwiriye gukorwa n’amatorero yose mu rwego rwo gufasha urubyiruko kuva mu biyobyabwenge n’ibindi bibi byinshi.
Yavuze ko urubyiruko rukeneye gukeburwa buri munsi mu rwego rwo kwirinda inda zitateganyijwe, kwirinda ibiyobyabwenge, bakerekwa uburyo amategeko yakajijwe mu gukumira ababikora.
Uyu muyobozi yakomeje avuga ko bifuza kujya babukora kenshi kugira ngo bigishe abakiri bato biga mu mashuri yisumbuye ko ibiyobyabwenge ubikoresha aba ari kwihemukira.
