Mu Kagari ka Bishenyi, Umudugudu wa Rubiha mu Murenge wa Mwurire ahazwi nko mu cyanya cy’inganda cya Rwamagana hafatiwe inzoga zitujuje ubuziranenge zikorerwa mu ruganda rwatse uburenganzira bwo gukora Renjete.
Kuri uyu wa 17 Werurwe, mu ruganda rwa Loa rw’abashinwa rufitemo ibice bitatu bikoreramo (abakora Amatara yo mu nzu, Bombo na Ranjete) iki gice gikora Renjete ahari hagenewe ububiko niho havumbuwe ko hengerwa inzoga zitujuje ubuziranenge zizwi nka Kambuca.
Nyuma y’uko Polisi y’Igihugu ifatanyije n’ubuyobozi bw’umurenge bitabaje ikigo gishinzwe kugenzura ibiribwa n’imiti mu Rwanda FDA kugira ngo barebe ko ibikorerwa muri iki kigo byaba byujuje ubuziranenge.
Bimwe mu byagaragaye mu igenzura ni uko hari abantu bayitiriye uruganda rufite ibyangombwa bakora ibinyobwa bya Igisubizo n’Igikundiro, aba bakaba nta byangombwa bagiraga ariko bafite Kampani yitwa Generation Sdco Ltd.
Ibi kandi binemezwa n’umubozi w’ibikorwa muri iyi kampani wafatiwe muri iki kigo, aho yavuze ko bari bamaze iminsi barasuwe na FDA basanga nta byangombwa bafite.
Umunyamabanga Nshingwabikorwa w’Umurenge wa Mwurire Zamu Daniel avuga ko basanze ibyakorerwaga muri uru ruganda maze biramenwa aboneraho kugira icyo asaba abakora mu buryo butemewe,
Yakomeje agira ati: “Mu bikorwa byose abantu baba bashaka gukora bibafitiye akamaro bakwiye kubanza kubaza inzego zibishinzwe kugira ngo bakore ibintu byubahirije amategeko.”
Ibyafashwe birimo litiro 10,400 ziri mu bibido, amacupa yitiriwe Igikundiro 6888, amacupa y’ikitiriwe Igisubizo 1008, amacupa ya plastike 6200 n’ibiro 200 by’isukari.
Nyuma y’ubugenzuzi bwa FDA, kampani
Generation Sdco Ltd yaciwe amande angana n’amafaranga arenga miliyoni 37
(37 592 000 frw) aho iyi kampani yakoreraga hafunzwe.
