Kuri uyu wa Gatandatu tariki ya 25 hirya no hino mu gihugu habaye umuganda usoza ukwezi kwa Mutarama 2020, ni umuganda witabiriwe nkuko bigaragazwa n’amafoto atandukanye yo mu turere, imirenge, utugari n’imidugudu byo mu Ntara y’Iburasirazuba.
Ni umuganda wibanze cyane ku kubakira imiryango itishoboye itagiraga aho kuba, gusibura imiferege, gukora neza imihanda y’imigenderano, gusiza no kubaka ubwanikiro abaturage bazakoresha banikaho ibigori n’ibindi bikorwa bigamije iterambere ry’imibereho myiza y’abaturage.
Mu Karere ka Nyagatare
Muri aka Karere umuganda usoza ukwezi kwa Mutarama wabereye hirya no hino mirenge n’utugari tugize Nyagatare, ku rwego rw’Akarere ubera mu Murenge wa Matimba ahari kubakirwa imiryango 30 itishoboye itari ifite aho kuba. Ikazatuzwa mu Mudugudu wa Bwera. Uyu muganda witabiriwe n’Umuyobozi Mukuru wa REG Ron Weiss, Umuyobozi w’Akarere ka Nyagatare Mushabe David Claudian, na Perezida w’Inama Njyanama y’Akarere n’abandi.
Umuyobozi Mukuru wa REG Ron Weiss (wunamye uri guterura ibuye) ni umwe mu bitabiriye umuganda usoza Mutarama i Nyagatare
Mu Karere ka Ngoma
Muri aka Karere, umuganda usoza ukwezi kwa Mutarama ku rwego rw’Akarere wabereye mu Murenge wa Rukumberi, Akagari ka Rubago, Umudugudu w’Akabungo, abawitabiriye babumbye amatafari ya rukarakara yo kubakira abaturage batishoboye. Muri uyu mudugudu hazubakwa inzu 20 zizatuzwamo imiryango 20 yo muri uyu Murenge itari ifite aho kuba.
Muri uyu muganda hanatunganyijwe ahazubakwa izo nzu.
Mu Karere ka Gatsibo
Umuganda rusange usoza ukwezi kwa Mutarama 2020 wakorewe mu mirenge yose hibandwa ku kubakira abaturage batishoboye no gusiza ibibanza bizubakwaho ubwanikiro bw’imyaka, muri aka karere hateganyijwe kubakwa ubwanikiro 98 bukazuzura muri Gashyantare.
Ku rwego rw’Akarere umuganda wakorewe mu Murenge wa Kiziguro,mu Kagari ka Mbogo Umudugudu wa Ryabihura. Hasijwe ikibanza cy’ubwanikiro buzakoreshwa na Koperative ya BOMAFACO.
Mu Karere ka Rwamagana
Mu Karere ka Rwamagana, umuganda usoza ukwezi kwa Mutarama wabereye mu Murenge wa Nzige aho wanitabiriwe n’abasenateri bayobowe Visi Perezida wa Sena ari kumwe n’Umuyobozi w’Intara y’Iburasirazuba Mufulukye Fred.
Mu Karere ka Kirehe
Mu mirenge 12 igize Akarere ka Kirehe, umuganda rusange usoza ukwezi kwa Mutarama, abawitabiriye bibanze ku gusiza ibibanza by’ahazubakirwa imiryango itishoboye, kubumba amatafari azakoreshwa mu kubakira imiryango itishoboye inzu.
Ku rwego rw’Akarere Umuyobozi w’Akarere Muzungu Gerald yifatanyije n’abaturage bo mu Murenge wa Mpanga, Akagari ka Nasho mu Midugudu ya Nyabubare l, II uw’Agasasa.
Mu Karere ka Kayonza
Umuganda ku rwego rw’Akarere ka Kayonza, wabereye mu Mudugudu wa Gatebe, mu Murenge wa Mukarange mu mujyi wa Kayonza. Abajyanama mu nama njyanama bifatanyije n’abaturage bakorera imihanda yaciwe umwaka ushize mu rwego rwo kubahiriza igishushyanyo mbonera cy’umujyi wa Kayonza.
Umuyobozi w’Akarere ka Murenzi Jean Claude yibukije abaturiye iyi mihanda kujya bayitaho bakayikora batarindiriye igikorwa cy’umuganda.
Mu Karere ka Bugesera
Ku rwego rw’Akarere umuganda usoza Mutarama 2020, wakorewe Murenge wa Musenyi, Akagari la Rulindo , abawitabiriye bahanze umuhanda w’umugenderano ahareshya n’ikirometero kimwe.
Muri uyu muganda, Ubuyobozi bw’Akarere ka Bugesera bwanafatanyije n’abashyitsi baturutse mu Gihugu cya Sénégal bari mu ruzinduko mu Rwanda, barimo CHEIKHNA CAMARA Umuyobozi wa Commune BALLOU, BARDO DIOP, Umuyobozi wa Commune ya PATTE D’OIE.
Muri rusange, hirya no hino mu Ntara y’Iburasirazuba ibikorwa byinshi byakozwe ku bwiganze ni ibigamije gushakira imiryango itishoboye idafite amacumbi aho kuba.
Minisiteri y’Ubutegetsi bw’Igihugu igaragaza ko biteganyijwe ko muri Werurwe 2020, mu gihugu cyose imiryango idafite aho kuba izaba yamaze kubakirwa.
