Abagore 175 bo mu karere ka Rwamagana basuye umuhora w’urugamba rwo Kwibohora wa Kagitumba-Gikoba biyemeje kuba impinduka z’iterambere mu byo bakora mu nzego zitandukanye.
Kuri uyu wa 01 Nyakanga nibwo bamwe mu bagore bahagarariye abandi barimo, abagize Inama y’Igihugu y’Abagore, abikorera mu mirimo itandukanye, ba Ndabaga nka bamwe mu bari abagore cyangwa se abakobwa bari mu ngabo z’Inkotanyi ubwo mu rugamba rwo kubohora u Rwanda ndetse n’abavuga rikumvikana bo muri Rwamagana, basuye amateka yo Kubohora u Rwanda, aho yatangiye ku mupaka wa Kagitumba.
Bakomereje ku musozi wa Nyabwishongezi ahatabarukiye Intwari y’u Rwanda Gisa Fred Rwigema, uru rugendo rwashorejwe mu Murenge wa Tabangwe ahitwa Gikoba hari amateka y’ubutaka bwa mbere Ingabo za FPR Inkotanyi zafashe.
Aha Gikoba kandi hagaragara ikigereranywa nk’inzu ariko mu bya gisirikare izwi ku izina ry’indake (ni uburyo bw’ubwirinzi bwo gucukira mu butaka hagatindishwa ibintu byinshi ku buryo wa kwihishamo umwanzi ntakubone cyangwa ngo akurase ku buryo bworoshye) yabagamo uwari umugaba mukuru w’ingabo za RPA ubu akaba ari Perezida wa Repubulika Kagame Paul.
Bamwe mu bagore bari bitabiriye uru rugendo bemeza ko bahakuye isomo rikomeye bakaba impinduka z’iterambere bahereye ku byo bakora cyangwa se inshingano bahawe.
Uwamahoro Rehma ni umucuruzi w’amazi ya Jibu mu Karere ka Rwamagana yemeza ko nk’abikorera bagomba gushingira ku gutanga serivisi nziza bakirinda ubwirasi mu bucuruzi bwabo.
Yakomeje agira ati: “Ku bacuruzi uru ni urugendo rwiza cyane, kuko iyo urebye abacuruzi ba mbere ya Jenoside yakorewe abatutsi mu 1994 harimo bamwe bafashe amafaranga yabo bashyigikira Jenoside baranayikora, ariko ubu umucuruzi arahabwa umurongo n’igihugu cyiza akagira ingamba zo gutanga umusoro ku gihe kandi neza cyane cyane ko ibyo twagezeho buri wese abibonesha amaso.”
Inderere Marie Jeanne nawe ni umwe mu bagore b’i Rwamagana, yemeza ko gutegura uru rugendo bagizemi uruhare bwari uburyo bwiza bwo kwigira ku Inkotanyi uko zabohoye igihugu.
Yagize ati: “Bari bake, bafite bike ariko ntibakoze bike, abantu babohoye iki gihugu cyacu bakoresheje imbaraga nyinshi n’ubwenge bwinshi abandi benshi bahatakariza ubuzima, twe ubu dufite igihugu gifite amahoro, umutekano niyo mpamvu twiyemeje gutera ikirenge mu cyabo kugira ngo hatazagira icyahungabanya iki gihugu cyacu.”
Yakomeje avuga ko uburyo bagiye gukoresha ari ukwifashisha aba bagore bagiye mu rugendo, bakabera abandi intumwa zo kurushaho gukorera igihugu mu nzira y’iterambere.
Umuhuzabikorwa w’Inama y’Igihugu y’Abagore Uwanyirigira Claudine asobanura ko iki gikorwa cyateguwe mu buryo bwo kwigira ku mateka bitewe n’uko ubuyobozi bwiza buriho ubu bwahaye ijambo umugore w’umunyarwandakazi.
Uru rugendo rwiswe “Rwamagana, Abagore Turashima” bari baherekejwe n’Umuyobozi w’Akarere wungirije ushinzwe imibereho myiza y’abaturage Umutoni Jeanne, yavuze ko nyuma y’uru rugendo bagiye guhindura byinshi.
Yakomeje agira ati: “Tugendeye ko Inkotanyi zakoze byinshi kuri bike zari zifite tukarora twebwe ibyo igihugu cyaduhaye, uyu munsi dufite byinshi bishobora gutuma dutanga serivisi nziza, rero mutwitege mu mitangire ya serivisi, kugira abaturage bishimye kubegera, kubegera no kubakorera ibyo dukwiye kubakorera kuko abenshi bari hano baratowe”
Usibye icyi cyiciro cy’Abagore, muri Rwamagana hari ibindi byiciro byasuye uyu muhora w’amateka yo Kwibohora wa Kagitumba-Gikoba, barimo Nyobozi na Njyanama, Urubyiruko, abanyamabanga nshingwabikorwa ndetse hari n’imirenge ibiri imaze kuhasura,
kandi uyu mwitozo urakomeje ko n’ibindi byiciro bizahasura.
