Perezida Kagame yashizeho Abayobozi mu Rwego rw’Igihugu rushinzwe iperereza n’umutekano aho Col. Jean Paul Nyirubutama yagizwe Umunyamabanga Mukuru Wungirije akaba n’Umuyobozi Mukuru ushinzwe iperereza n’umutekano byo hanze y’Igihugu (NISS) naho ACP Lynder Nkuranga yagizwe Umuyobozi Mukuru w’Abinjira n’Abasohoka mu Gihugu(Immigration &Emigration).
Itangazo ryemeza ishyirwaho ryabo ryashyizwe ahagaragara n’Ibiro bya Minisiteri w’Intebe ku mugoroba wo kuri uyu wa Mbere, Tariki 6 Nzeri 2021 ku rubuga rwa Twitter.
Col. Jean Paul Nyirubutama wagizwe Umunyamabanga Mukuru Wungirije akaba n’Umuyobozi Mukuru ushinzwe Iperereza n’Umutekano byo hanze y’Igihugu, mu kwezi kwa Kamena 2021 nibwo yari aherutse kuzamurwa mu ntera ava ku ipeti rya Lieutenant Colonel.
ACP Lynder Nkuranga wagizwe Umuyobozi mukuru w’Abinjira n’Abasohoka mu Gihugu, yari amaze umwaka umwe ari we Muyobozi mu rwego rw’Igihugu rushinzwe Iperereza n’Umutekano (NISS) Ushinzwe Iperereza ryo hanze y’igihugu.
