Ibiro bya Perezida wa Repubulika byatangaje ko kuri uyu mugoroba wa tariki 31 Gicurasi 2021 Perezida Paul Kagame yayoboye inama y’Abaminisitiri yiga ku ngingo zitandukanye zirimo n’ingamba zo kwirinda no gukumira ikwirakwira ry’icyorezo cya COVID-19.
Ibiro bya Perezida wa Repubulika bitangarije ibi mu kanya gashize ku rukuta rwa Twitter. Inama nk’iyi yaherukaga guterana ku wa Gatatu tariki 5 Gicurasi.
Icyo gihe yari yafatiwemo ingamba zirimo ko ingendo zibujijwe guhera saa yine z’ijoro kugeza saa kumi za mugitondo, ariko zikaba zibujijwe guhera saa moya z’ijoro kugeza saa kumi za mugitondo mu turere tw’Intara y’Amajyepfo twa Ruhango, Huye, Nyanza, Gisagara, Nyaruguru na Nyamagabe,
Imodoka zitwara abagenzi mu buryo bwa rusange zemerewe gutwara abatarenze mirongo irindwi na gatanu ku ijana(75%) by’umubare w’abantu zemerewe gutwara, abatwara za bisi basabwa kugenzura ko abagenzi bahana intera kandi bagatwara gusa abambaye agapfukamunwa.
Insengero zemerewe gukora zikakira 50% by’ubushobozi bwazo bwo kwakira abantu,
Umubare w’abitabira ikiriyo nturenge abantu 10 icyarimwe, naho imihango yo gushyingura ntirenze abantu 30.
Ingamba zari zafashwe tariki ya 5 Gicurasi kandi zarimo ko ishyingirwa rikorewe imbere y’ubuyobozi no mu nsengero zemewe ariko rikitabirwa n’abantu batarenga 30, kandi hakubahirizwa ingamba zo kwirinda Covid-19, naho ibirori byo kwiyakira byo bikaba bibujijwe.
Kuva icyorezo cya COVID-19 cyagera mu Rwanda muri Werurwe 2020 hari ibikorwa bimwe na bimwe bitari byafungurwa kubera ingamba zo gukumira ikwirakwira ry’iki cyorezo harimo nk’utubari, imikino y’amahirwe izwi nka ‘Betting’.
Abamaze kwandura iki cyorezo mu Rwanda basaga 26,900, abavuwe bakagikira bo basaga 25,600, mu gihe abamaze guhitanwa n’iki cyorezo bagera kuri 350, kugeza kuri uyu 30 Gicurasi Minisiteri y’Ubuzima yatangaje ko abari bakirwaye Covid-19 ari 957; barimo batandatu barembye.
Mu Rwanda kandi abantu basaga ibihumbi 350 bamaze guhabwa inkingo zombi z’Icyorezo cya Covid-19.
