Ubuyobozi bw’Akarere ka Nyagatare bwahurije hamwe abahanzi batandukanye barimo Imena cultural group n’umuhanzikazi Audia Intore mu birori byo gusoza umwaka hishimirwa ibyiza byagezweho, banarebera hamwe ingamba zikwiye gufatwa mu gukomeza kwesa imihigo.
Ni ibirori bizaba mu nkera y’imihigo izaba ejo ku wa Gatanu ku wa 29 Ukuboza 2022 muri salle izwi nka Cyamazima iherereye munsi y’ibiro by’Akarere ka Nyagatare.
MUHAZIYACU yagiranye ikiganiro cyihariye n’umuhanzikazi Audia Intore, uririmba indirimbo gakondo cyane cyane izirata ubutwari bw’inkotanyi zagize uruhare mu kubohora Igihugu zigaharika Jenoside yakorewe Abatutsi 1994.
Audia Intore yavuze ko yiteguye igitaramo neza, akaba yiteguye guhereza ibintu byiza abanyarwanda by’umwihariko abaturage b’Akarere ka Nyagatare mu ndirimbo gakondo zirata ubutwari bw’abanyarwanda bagezeho by’umwihariko Inkotanyi
Ati: “Ndi umuhanzikazi nahisemo kuririmba indirimbo nk’izi kuko nabonaga ari impano yanjye ngombwa kumurikira abanyarwanda muri rusange, nashyize indirimbo yanjye ya mbere muri 2012, abazitabira igitaramo bazabona indirimbo z’inkotanyi zirata ubutwari bw’abanyarwanda muri rusange.”
Yakomeje agira ati: “Tuzafatanya n’abandi kuko ndacyari muto nubwo mfite impano yo kuririmba indirimbo zirata umuco n’ubutwari muri rusange, nkunda kuririmba izirata amateka yacu nk’izicyunamo n’izindi, jye ndi umuhanzikazi ufite ibyo yagezeho ndi umwe mu bahanzikazi bafite album kandi bakoze igitaramo hano mu Rwanda.”
Umuyobozi w’Akarere ka Nyagatare Gasana Stephen mu kiganiro aherutse kugirana na MUHAZIYACU yavuze ko nk’Akarere bafite gahunda ngari yo gukomeza kumenyekanisha inzira yanyuzwemo n’Inkotanyi zibohora Igihugu izwi nka Liberation corridor bityo bigatuma abantu bose bamenya amateka yaranze u Rwanda bikaba byanafasha abakiri bato.
Yakomeje agira ati: “Ikindi nk’abantu ba Nyagatare ni ugukomeza gutegura ibikorwa bimenyekanisha amateka yaranze urugamba rwo kubohora Igihugu cyacu bikaba byarabereye mu Karere kacu by’umwihariko ni urugendo duhamagarira abantu bose yaba aba Nyagatare n’abo mu gihugu hose kujya baza tukifatanya.”
Buri uko umwaka usojwe mu Karere ka Nyagatare hategurwa igitaramo cy’imihigo z’intore z’Akarere Imparirwakurusha kiba kigamije kurebera hamwe ibyagezweho n’ibiri mu igenamigambi ry’umwaka ukurikiyeho kugira ngo bizagerweho nta makemwa.
