Ubuyobozi bw’Akarere ka Nyagatare bwasobanuriye abaturage bo mu Murenge wa Mukama ko Ejo Heza idafasha gusa abitabye Imana, bikuraho urujijo bamwe bari bafite kuri iyi gahunda,
Kuri uyu wa 15 Werurwe mu Murenge wa Karama, ubwo hakorwaga inama mpuzabikorwa y’Umurenge hagarutswe ku kamaro ka Ejo Heza. Muri iyi nama hamuritswemo imihigo n’aho ijyeze ishyirwa mu bikorwa.
Ku muhigo wo kongera ubwizigame muri gahunda ya Ejo Heza, Umuyobozi w’Umurenge yavuze ko bahigiye imbere ya Guverineri w’Intara y’Iburasirazuba ko ku ya 30 Mata 2022, umuhigo wa Ejo Heza uzaba uri ku 100%.
Umuyobozi w’Akarere ka Nyagatare wungirije ushinzwe imibereho myiza y’abaturage Murekatete Juliet, yavuze ko Ejo Heza itagoboka gusa abitabye Imana,
Yakomeje agira ati: “Hari abaturage bari bazi ko amafaranga ya Ejo Heza ahabwa umuryango w’umuntu wapfuye gusa, ariko sibyo twabibasobanuriye ko ari amafaranga ashobora kuzakugoboka mu zabukuru, cyangwa waba wananiwe kwishyurira umwana ishuri, ukaba wayakoresha, hari n’igihe nitumara kwizigamira menshi bashobora kuzavuga ngo urafata 50% yayo uyikenuze, cyangwa uyakoreshe imishinga mito ishobora kubyara inyungu.”
Umunyamabanga w’inama njyanama y’Akarere ka Nyagatare Umurerwa Aisha, akaba ashinzwe gukurikirana Umurenge wa Mukama na we wari witabiriye inama mpuzabikorwa y’Umurenge wa Mukama yavuze ko bagiye gufatanya n’abayobozi b’umurenge, Utugari, Imidugudu n’Amasibo mu gukora ubukangurambaga mu baturage kugira ngo barusheho gusobanukirwa akamaro n’ibyiza byo kwitabira gahunda ya Ejo Heza.
Imibare itangazwa n’ubuyobozi bw’Umurenge wa Karama ni uko uyu muhigo ugeze ku gipimo cya 71% muri uyu mwaka w’imihigo wa 2021/2022.
