Aba Dasso (urwego rwunganira akarere mu mutekano) bakorera mu Karere ka Ngoma bahabaye ingo zirindwi ibikoresho bitanga amashanyarazi akomoka ku izuba mu rwego rwo kurushaho kwegera abaturage.
Inzu zirindwi zubakiwe abatishoboye muri gahunda yo gutuza abaturage bari bafite ibibazo bibangamiye ubuzima bwabo (human security issues) ziri mu mudugudu wa Muyange mu kagari ka Cyerwa mu murenge wa Gashanda, nizo zahawe aya mashanyarazi afite agaciro k’amafaranga ibihumbi 520 yose yakusanyijwe n’aba Dasso ku giti cyabo.
Bamwe mu baturage bahawe aya mashanyarazi bavuga ko aje kubabera igisubizo cy’umutekano baterwaga no kuba mu mwijima.
Sengimana Innocent ni umwe muri aba baturage afite imyaka 55, avuga ko yatujwe muri aya mazu mu kwezi kwa Kamena, dore ubuhamya bwe mbere y’uko bahabwa aya mashanyarazi.
Yagize ati: “Hambere ahangaha igikoko cyaraje kidutwarira itungo kuko hatabonaga, aya mashanyarazi bayadushyiriyemo ejo iri joro twe n’abana twaraye tubyina, twishima kuva mu kwa gatandatu twatura aha nta rumuri twagiraga, twaryamaga kare.”
Undi muturage nawe uhamya ko aya mashanyarazi aje ari igisubizo kuri bo ni Hakiziyaremye Stephanie; yagize ati: “Naraye neza naraye ahantu habona, nta kibazo narimfite, ubu intego mfite ni uko nanjye nakwiteza imbere, kugirango ndusheho gufata neza ibi bampaye.”
Umuyobozi w’akarere wungirije ushinzwe ubukungu n’iterambere, Nyiridandi Mapambano Cyriaque yashimye ibikorwa bya Dasso mu karere ka Ngoma, agira ati: “Aya mazu yubakiwe abatishoboye, Dasso ikorera mu karere kacu bagize igitekerezo cyiza nabo mu muganda wabo bagize igitekerezo cyiza.”
Yakomeje ati: “Turabashimira, ni igikorwa cyiza gikwiye kuba urugero no ku bandi bafatanyabikorwa.”
Muri uyu mwaka wa 2020 Dassso ya Ngoma yasannye inzu y’umukecuru utishoboye mu murenge wa Remera, bahuza imiryango 80 yabanaga mu makimbirane, ibi byiyongera ku gikorwa cy’ubu cyo gucanira imiryango 7 y’abatishoboye.
