Polisi y’u Rwanda ikorera mu Karere ka Ngoma ifatanyije n’urwego rwunganira uturere mu gucunga umutekano DASSO, bataye muri yombi abaturage babiri bari bari kugenda bakwirakwiza amafaranga y’amiganano.
Aba baturage barimo umwe ufite imyaka 45 ndetse n’undi ufite imyaka 27 bakaba bafashwe bari kuri moto bamaze guha umu agents ibihumbi 50 Frw ngo abibabikire.
Bafatiwe mu Mudugudu wa Torero mu Kagari ka Mutenderi mu Murenge wa Mutenderi mu Karere ka Ngoma.
Ngenda Mathias, Umunyamabanga Nshingwabikorwa w’Umurenge wa Mutenderi ubwo yaganiraga na MUHAZIYACU, yavuze ko aba baturage bafashwe nyuma yo gutabazwa n’abaturage.
Yagize ati ” Hari uwo bari bamaze gutuburira bamuhaye 50 000 Frw ngo ayababikire arebye asanga ni amiganano yitabaza ubuyobozi, rero twahise tubashakisha tuza kubafata bari kuri moto duhita tubashyikiriza RIB sitasiyo ya Kibungo.”
Yasabye abaturage kwitonda bakajya babanza gushishoza ku mafaraga babahaye ngo kuko hari ubwo babona abantu nk’aba babaha amafaranga y’amiganano.
Ubwo aba bagabo bafatwaga basanganwe andi mafaranga y’amiganano ibihumbi 628 Frw asanga ibihumbi 50 Frw bari bahaye umu agents, aya mafaranga yose ngo akaba yari yiganjemo inote za 2000 Frw ndetse n’ iza 5000 Frw.
