Abantu bane barwaye Covid-19 batorotse aho bavurirwaga mu kigo cyo mu Murenge wa Kibungo, mu Karere ka Ngoma mu ijoro ku wa 8 rishyira kuri uyu wa 9 Nyakanga 2020.
Amakuru agera kuri MUHAZIYACU agaragaza ko byabaye ahagana i saa moya n’igice z’umugoroba aho abo bantu ngo baciye ibyuma by’idirishya ry’aho bari bari bakagenda.
Ni bamwe mu bafungwa baherutse gutahurwaho Covid19 bari bafungiye muri Kasho ya Polisi i Musamvu, nyuma bagashyirwa mu kigo kimwe bagatangira kuvurwa (Treatment centre yashyizwe mu kigo cya ASPEK).
CP John Bosco Kabera Umuvugizi wa Polisi y’u Rwanda yahamirije MUHAZIYACU iby’aya makuru anavuga ko nta gikuba gikwiye gucika kuko batangiye gushakishwa.
Yagize ati: “Ni byo bariya bafungwa batorotse bane, ubu barimo gushakishwa.”
Yakomeje agira ati: “Abaturage barasabwa kureba umuntu batazi bakamufata, ushobora gusanga ari ba bandi. Ikindi ni ugukomeza gushyira mu bikorwa izi ngamba zo kwirinda Covid19. Ubwo urumva hari abo bari basanzwe bazi, noneho abo bandi rero batorotse bayifite birumvikana yuko bakwiye kugira uruhare rwabo rukomeye, uwo abaturage bakeka babwira inzego z’umutekano ariko na bo ubwabo bagakomeza ingamba zo kwirinda Covid19 kuko iracyahari.”
CP Kabera avuga ko imyirondoro y’aba bantu bane batorotse mu kigo bavurirwagamo Covid-19 izwi neza n’aho bakomoka.
Ati: “Ubwo rero mu iperereza ririmo gukorwa no gukomeza kuvugana n’inzego z’ibanze n’ iz’umutekano hirya no hino muri ako karere mfite icyizere ko bari bufatwe, ikindi nuko inzego z’ubuzima ubwo zihita zibyumva kugira ngo ako gace baburiyemo, na bo bakora isesengura bakareba niba bashobora kuba bapima, ubwo na bo barakoresha ubuhanga bwabo bakore ibyo bashinzwe.”
Mu Rwanda kuva muri Werurwe tariki ya 14 kugeza ubu muri Nyakanga tariki 9, abantu 1,194 bamaze kurwara Coronavirus-Covid19, muri bo 610 baravuwe barakira, 581 baracyayirwaye; mu gihe abantu batatu ari bo bamaze guhitanwa na yo.
Nkeka umuntu ushakishwa atangarizwa abantu bakamumenya. Amazina byaba na ngombwa n’amafoto ahubwo.