Minisitiri w’ubutegetsi bw’igihugu Gatabazi Jean Marie Vianney yasuye bamwe mu batuye mu mudugudu wa Nkondo mu kagari ka Nkondo mu murenge wa Rwinkwavu bafite ikibazo cyo kutagira ibyangombwa by’ubutaka by’aho batuye mu butaka bw’ikigo gicukura amabuye y’agaciro ahazwi nka ‘Wolfram’, abizeza ko ikibazo cyabo kizakemurwa ntawe ubangamiwe.
Kuri uyu wa 02 Ugushyingo Minisitiri Gatabazi ari kumwe na Guverineri w’Intara y’Iburasirazuba CG Gasana K.Emmanuel, umuyobozi w’Akarere ka Kayonza Nyemazi John Bosco n’abandi bayobozi mu nzego zitandukanye bakorana basuye abaturage bafite ikibazo cyo kutagira ibyangombwa by’ubutaka harimo abamaze imyaka 60 batuye muri ubu butaka nta byangombwa barabona by’aho batuye.
Minisitiri w’ubutegetsi bw’igihugu Gatabazi Jean Marie Vianey ubwo yaganiraga na bamwe muri aba baturage yagize ati: “Hari raporo zitugeraho zivuga ko hari hari abantu bahatuye bahasanze ba sekuru na ba sekuruza baje gucukura amabuye y’agaciro, hari abahatuye nyuma ya Jenoside yakorewe abatutsi mu 1994 batujwe na leta, hari abahituje, abo bose ni abanyarwanda kandi buri wese afite uburenganzira.”
Minisitiri Gatabazi akomeza ahumuriza aba baturage batuye muri ubu butaka bukibarwa nk’ubwa ‘Mining’, yakomeje agira ati: “Hari kurebwa icyakorwa kugira ngo ubucukuzi bw’amabuye y’agaciro bukorwe ariko n’ibibangamiye abaturage biveho, icyo bizarangirizaho ni icyiza ntabwo bizarangira abantu bagiye, nonese wabirukana ukabajyana hehe?”
Hari umwe mu baturage umaze imyaka 65 atuye muri ubu butaka yemeza ko igihe cyose bahamaze nta burenganzira bafite ku butaka bw’aho bavukiye, Ngoyi Josiane yagize ati: “Muzehe wacu yazanywe n’abazungu bubaka inaha, hari ishyamba ari pariki aha bubatse aya mazu niho hari amazu y’iwacu, ahandi niho twahingaga tukabona ibidutunga.”
Nkomezamihigo John ni umwe mu baturage batuye muri ubu butaka mu mwaka w’i 1995 avuga ko bishimiye ihumure bahawe na Minisitiri Gatabazi ku ngingo yo kutagira ibyangombwa by’ubutaka, avuga ko bazanyurwa n’icyemezo bazahabwa na leta kuko ibakorera byinshi nabo bakaba bayitezeho ibyiza byinshi.
Abaturage bafite ikibazo cy’uko batuye mu butaka bwa Kompanyi icukura amabuye y’agaciro ya Wolfram ni 391, muri aba harimo abafite ibibazo by’uko nta byangombwa by’ubutaka bafite; abandi bakaba basaba ingurane kugira ngo bimurwe.
