Mu rwego rwo kongera ubumenyi mu bijyanye n’imikorere ya za mudasobwa abanyeshuri bo mu mashuri makuru na za Kaminuza zo Rwanda bagiye gushyirirwaho amarushanwa mu by’ikoranabuhanga, akazakorwa ku bufatanye bwa Leta y’u Rwanda na Sosiyeti Huawei ifite ikicaro mu Bushinwa.
Nk’uko bikubiye mu nkuru MUHAZIYACU ikesha Kigalitoday, ayo amarushanwa agiye gukorwa muri uyu mwaka ari muri gahunda Huawei yatangije mu 2015 afite intego yo guteza imbere ikoranabuhanga mu burezi mu mashuri makuru na za kaminuza no mu mashuri y’imyuga n’ubumenyingiro (TVET).
Kalema Gordon, Umuyobozi ushinzwe iterambere ry’ikoranabuhanga muri Minisiteri y’ikoranabuhanga mu itumanaho na Inovasiyo avufga yavuze ko iri rushanwa rizafasha mu guteza imbere ubumenyi mu ikoranabuhanga, bikagera no kuri sosiyete zikizamuka.
Yagize ati: “Kubaka ikoranabuhanga rihamye mu gihugu cyacu birasaba kugira abanyempano bafite ubushobozi bwo guhanga udushya. Ntabwo igihugu cyagera ku ntego zo kugira abahanga mu ikoranabuhanga hatari abanyempano n’abafatanyabikorwa nka Huawei.”
Abanyeshuri basaga 10,000 bo muri Afurika yo munsi y’Ubutayu bwa Sahara, ni bo bateguriwe ayo marushanwa, agamije kubafasha kuzamura ubumenyi bwabo mu ikoreshwa rya mudasobwa mu rwego ruhanitse, muri porogaramu zirimo umutekano w’ibibikwa muri mudasobwa, ibijyanye n’ubwenge bukorano n’ibindi binyuranye.
Ibyo kandi biri muri gahunda ya Huawei yo guteza imbere urwego rw’ikoranabuhanga mu mirimo inyuranye, aho abantu bahugurwa bityo bakazafasha za Leta kuzamura urwego rw’ikoranabuhanga mu mirimo.
Yang Shengwan Umuyobozi wa Huawei mu Rwanda avuga ko ayo marushanwa azakorwa mu byiciro binyuranye birimo ku rwego rw’igihugu, urwa Afurika no ku rwego mpuzamahanga.
Yagize ati: “Muri iyi gahunda, turashaka ko urubyiruko bazamo ari benshi, bakaba babonamo amahirwe menshi ashoboka, bikabagirira akamaro, imiryango yabo n’ibihugu byabo. Ndashishikariza abanyeshuri kwitabira irushanwa ry’uyu mwaka, kuko abazatsinda bazafashwa kubona ho bakorera imenyerezamwuga ndetse bakaba bashobora kubona n’akazi”
Abazahiga abandi muri ayo marushanwa bazahembwa ibikombe, telefone, mudasobwa, seritifika, ndetse hari n’abazafashwa gukora ingendoshuri mu nganda mu karere no ku rwego mpuzamahanga.
