Perezida w’Inama Njyanama y’Akarere ka Gatsibo Sibomana Saidi yemeza ko hari ibibazo bikomeye byatumye bahitamo kujya mu mwiherero mu karere ka Nyagatare, ni umwiherero w’iminsi itatu kuva tariki 05 kugeza kuya 07 Kanama.
Abayobozi 64 bo mu karere ka Gatsibo bitabiriye umwiherero wateguwe n’Akarere.
Mu mvugo ye Perezida wa Njyanama ya Gatsibo Sibomana yagize ati: “Turacyafite abaturage bafite ikibazo cy’aho baba hagendanye n’icyerekezo cy’igihugu cyacu, turashaka mu buryo butandukanye ko umunyarwanda agira ahantu heza atura kandi hamubereye.”
Indi ngingo izaganirwaho ijyanye n’ikibazo cy’ibutaka butabyazwa umusaruro uko bikwiye,
Perezida wa Njyanama Sibomana yakomeje agira ati: “Turacyafite ubutaka bwinshi budakoreshwa dukwiye kubyaza umusaruro, hari ubutaka buhingwa n’ubutaka bwagenewe ubworozi nko mu nzuri turashaka kuganira ku buryo twakongera umukamo, ni gute twakongera amatungo meza atanga umusaruro kurusha uwo twari dufite.”
Ikindi kibazo ngo ni imijyi ya Kabarore, Ngarama na Kiramuruzi idakura, kuri iki kibazo Sibomana yagize ati: “Turashaka uburyo haba impinduka muri ibyo bice twita imijyi, haba impinduka muri serivisi, impinduka mu bucuruzi, impinduka mu miturire, impinduka n’uburyo iyo mijyi iteye ku buryo ikurura abantu baje kuhaba.”
Hari kandi amahirwe y’uko Gatsibo ari amarembo y’inzira ijya muri Parike y’Akagera ibi nabyo biri mu bikwiye kuganirwaho by’umwihariko kugira ngo aya mahirwe agirire akamaro abanyagatsibo muri rusange.
Mu bindi biribandwaho harimo kurwanya indwara ziterwa n’imirire mibi n’igwingira ry’abana, kureba kuri serivisi zihabwa abaturage mu nzego zose, hakarebwa uko serivisi zihabwa abaturage zikwiye kuba ari nziza kandi zigatangwa zihuse muri izi serivisi harimo iz’ubutaka, kwa muganga, mu mashuri ndetse n’izitangwa n’abikorera.
