Nyiramongi Consolate ni umukecuru w’imyaka 79 warokotse Jenoside yakorewe Abatutsi mu 1994 avuga ko mu bihe byo kugenda yihishahisha yafashijwe n’umupadiri w’umudage Otto Mayer wabaga Rukomo ndetse na Bigirabagabo Gervaise wari umudepite.
Mu buhamya bwe avuga ko we n’umugabo we Kabera Zacharie batangiye guhunga mu 1962 nyuma y’uko umugabo we yari arangije kwiga muri ETO Kicukiro.
Nyiramongi agaruka ku rugendo rwo guhunga no guhunguka, kugenda yihishahisha, gufashwa na Padiri, uko yahuye na Birindabagabo kugera Inkotanyi zibohoye Igihugu.
Ati: “Twahungiye Uganda mu 1962 umugabo arangije kwiga Kicukiro, yagaruwe mu 1977 n’abantu biganye bamubwiye ko u Rwanda rwagize amahoro cyane cyane ko mu mahanga kubona akazi byari bigoye. Ubwo arahunguka ndetse njye mbanza kwanga, we araza abona akazi muri OVOPAM ko kubakisha kuko yasabye akazi muri Leta baramubwira bati:”Abatutsi baruzuye.”
Yakomeje avuga ati “Twageze Rukomo rero ntabwo twahagiriye amahoro twaje turi inyenzi zije gutata, tuba aho kugeza mu 1990 bamwica, bamufashe tariki 05 mu Kwezi kwa Munani bamujyana kuri Komini atwarwa na Burugumesitiri wa Komini Muvumba Rwabukombe.”
Nyiramongi avuga ko bakomeje kujya kubaza umugabo we kuri Komini bakababwira ko adahari ahubwo batangira kubahiga we n’abana be maze abahungishiriza ku mupadiri w’umudage witwaga Otto Mayer.
Yakomeje avuga ko aho yanyuraga bagendaga bamwishisha bamwita inyenzi kugera aho ahungiye i Kigali yagerayo bakabasaba gusubira iwabo kugira ngo bazabashe kubica kuko ari bo bari babazi neza.
Ati: “Abana twari kumwe bari banzi barambwiye ngo singende, nti eeeh singende abana banjye bose nabasize mu Mutara uru ruhinja mpetse nirwo nzarokokana narwo gusa ndagenda bazakore icyo bashaka.”
Muri uko kugenda yihishahisha Nyiramongi ngo yaje kugera ku ivuriro i Ngarama ahasanga umugangakazi witwa Adela akaba umugore wa Birindabagabo Gervais wahoze ari umudepite ngo barabafashije cyane barabacumbikira ndetse banabitaho.
Nyiramongi yasoje asaba abantu bose kuzamukundira Birindabagabo n’umugore we Adela maze ashimira Inkotanyi zabohoye Igihugu zigahagarika Jenoside yakorewe Abatutsi.
Ubuyobozi bw’Akarere ka Nyagatare burakomeza gushishikariza abaturage gufata mu mugongo abarokotse Jenoside yakorewe Abatutsi, bakirinda ingengabitekerezo ya Jenoside ndetse bakanatanga amakuru y’ahari imibiri itarashyingurwa kugira ngo ishyingurwe mu cyubahiro.
