Abarokotse Jenoside yakorewe abatutsi mu 1994 bafite ababo bashyinguye mu Rwibutso rwa Muyumbu barasaba ko bahabwa amakuru y’ababo bishwe batarabona kugira ngo bashyingurwe mu cyubahiro.
Kuri uyu wa 11 Mata mu Rwibutso rwa Jenoside yakorewe Abatutsi rwa Muyumbu hashyinguwe mu cyubahiro imibiri y’abantu batanu yabonetse, muri iyi myaka 27 hari imiryango y’abacitse ku icumu itarashyingura mu cyubahiro ababo.
Musonera Emile ni umwe mu bafite ikibazo cy’uko hari abe atarashingura mu cyubahiro, avuga ko mu muryango akomokamo wo kwa sekuru wari mugari cyane ugizwe n’abantu barenga 120 bari batuye ku musozi wa Bihembe mu Murenge wa Nyakariro, ariko ubu bakaba bamaze gushyingura mu cyubahiro abantu 15 gusa, yagize icyo asaba abantu bazi aho iyi mibiri iri bakaba badatanga amakuru.
Yagize ati: “Ndasaba ubufatanye ari abakoze Jenoside bagihari ari abandi baba bafite ayo makuru batubabarire, leta natwe yadusabye ikintu gikomeye natwe turagitanga tutizigamye, imbabazi ubumwe n’ubwiyunge nibyo, ariko nyuma y’imyaka 27 ugasanga hari abashyinguye umuntu umwe mu muryango wari ugizwe n’abantu 50 haracyarimo akabazo.
Kayiranga Alex ni umwe mu barokotse Jenoside yakorewe Abatutsi wo ku musozi wa Muyumbu avuga ko bababazwa cyane n’uko hari ababo batarabona ngo bashyingurwe mu cyubahiro. Yagize ati: “Kuri ubu hari abo twabuze tutarabona, tutarashyingura.”
Perezida w’umuryango Ibuka mu Karere ka Rwamagana ni Musabyeyezu Dative, mu ijwi ry’abacitse ku icumu rya Jenoside yakorewe abatutsi 1994, yagarutse ku gahinda gashengura abacitse ku icumu bafite ababo batarashyingura mu cyubahiro.
Yakomeje agira ati: “Hari impamvu twe nk’abacitse ku icumu dusaba ko twakwerekwa aho abo mu miryango yacu bari ngo tubashyingure mu cyubahiro, ni ukugirango tutibeshya ugasanga tubashakira aho batari, ugasanga nshakira data ku Muyumbu we yaraguye i Nyakariro.”
Umuyobozi w’Akarere ka Rwamagana Mbonyumuvunyi Radjab avuga ko nk’ubuyobozi bw’akarere bazakomeza kwigisha abaturage bagakangurira abazi ahari imibiri y’abatutsi bishwe muri Jenoside kuyigaragaza igashyingurwa mu cyubahiro.
Yakomeje asaba abafite aya makuru bose kuyatanga mu buryo bwo gufasha abacitse ku icumu ariko nabo ubwabo bifasha, kugirango babohoke.
Mu Rwibutso rwa Jenoside yakorewe aAbatutsi mu 1994 rwa Muyumbu hashyinguwemo imibiri igera ku 14,309.
