Ubuyobozi bw’Akarere ka Ngoma bufatanyije n’Umuryango strive Foundation na Komisiyo y’Igihugu y’Uburenganzira bwa muntu barashishikariza abagore kutitinya bakagira uruhare mu ikoranabuhanga.
Ibi byagarutsweho kuri uyu wa Gatatu, tariki ya 8 Werurwe 2023 n’Umuyobozi wa Karere ka Ngoma, Niyonagira Nathalie ku munsi mpuzamahanga w’umugore wizihirijwe mu murenge wa Kazo ku rwego rw’Akarere.
Niyonagira Nathalie yagarutse ku guhanga udushya n’ikoranabuhanga biteza imbere uburinganire.
Yakomeje agira ati: “Kutitinya tugakoresha ikoranabuhanga ibyo nibyo dushishikariza abagore, gusa turanashimira abafatanyabikorwa badufashije nka Strive Foundation ndetse n’abandi ariko nanone kugira ngo umubare w’abagore mu ikoranabuhanga wiyongere tubihera mu mashuri nk’ahantu barimo abana bazavamo abagore beza.”
Yongeyeho ko hatanzwe telefoni mu bakuru b’imidugudu no mu zindi nzego z’ Akarere ka Ngoma mu rwego rwo kubafasha kwisanga mu ikoranabuhanga ariko kandi ko bashishikarizwa kuba bagana ibigo by’imari kugira ngo bahabwe ikoranabuhanga rigezweho mu rwego rwo kuzamura no gutinyura umugore.
Muteteri Martha ni umuturage utuye mu mudugudu wa Kabimba, Akagali ka Kabimba akaba ari mu badakoresha ikoranabuhanga aho atanga serivisi z’Irembo, ariko agasaba ko abagore bamwe na bamwe bo mu cyaro bafashwa kuryisangamo.
Yagize ati: “Umunsi wa bagore ni mwiza kuko udufasha kwishima kandi ukatwereka ko dushyigikiwe mu iterambere ariko buriya mu cyaro hijya no hino abenshi ntiturikoresha,cyeretse iyo ufite ibibazo runaka nibwo uhura nabyo ariko nta telefoni wenda ufite ntiwahura naryo kandi mu by’ukuri byagakwiye.”
Bamwe mu bafatanyabikorwa b’Akarere ka Ngoma mu iterambere ry’umuturage bagaragaje ko umugore n’umwana bakwiye gufasha mu buryo bwose bushoboka.
Umuyobozi mukuru w’Umuryango Strive Foundation Rwanda, Muramira Bernard, yagarutse ku bijyanye n’uruhare rw’umugore mu iterambere rikoresha ikoranabuhanga, igihugu gikomeje gushyiramo imbaraga aho abenshi kuri ubu bafite telefoni abandi bagafasha n’abagabo mu ikoranabuhanga.
Perezidante wa Komisiyo y’igihugu y’Uburenganzira bwa Muntu,Mukasine Marie Claire yagize ati: “Ni Umunsi ukomeye kugira ngo dusuzume uko uburenganzira bw’umugore buhagaze mu bice byose by’ubuzima bwe, iyo tubisuzuma rero tureba n’ahakiri ibibazo kugira ngo hashyirwe imbaraga aho dusanga hakiri ibabazo nk’ihohoterwa rikorerwa umwana cyane cyane abana b’abangavu baterwa inda.”
Akomeza agira ati: “Muri iki gihe tugezemo isi yose ndetse n’igihugu cy’u Rwanda byitabiriye ikoranabuhanga mu bikorwa byose kugira ngo iterambere ryihute, ni ukuvuga ngo nta handi tugomba kuricikira bivuze ko tugomba kugendera muri uwo muhanda kugira ngo ikoranabuhanga rihindure imibereho yacu kandi turashimira yuko mwabigezeho binyuze no muri serivisi zitangwa n’abagore.”
Kuri uyu munsi kandi hatanzwe inzu ku muturage witwa Nzirikurembo Françoise, utuye mu Kagali k’ Umukamba, yubatswe n’abagore, hasezeranyijwe imiryango 24, hatangwa amatungo atandukanye arimo inka n’ihene ndetse n’ibindi bitandukanye.
Ku mugoroba nyuma y’ibirori hanabaye umupira wahuje abakozi b’Akarere ka Ngoma n’Urwego rwa bikorera(PSF) mu Karere ka Ngoma aho warangiye banganjije igitego 1-1.
