Bamwe mu rubyiruko rwo mu Karere ka Kirehe rurishimira ubuyobozi bwabubakiye inyubako y’imyidagaduro n’imikino ndetse n’Ikigo cy’Urubyiruko bigezweho kuko iri kubafasha kugaragaza impano zabo, kwirinda ibiyobyabwenge no guteza imbere imikino n’imyidagaduro muri rusange.
Iyi nzu yubatswe ahahoze ikibuga cya Kirehe mu isantere ya Nyakarambi ikaba ari inzu ikinirwamo imikino ya Volleyball, Handball, Basketball ndetse na Tennis yo mu nzu. Ifite ubushobozi bwo kwakira abantu 1000 bicaye neza ahantu hatwikiriye. Yuzuye itwaye miliyari 2.7 Frw.
Uretse iyi nzu, iruhande rwayo hanze hubatswe ibindi bibuga bya Basketball, Volleyball, handball n’indi mikino y’amaboko, nabyo bifasha urubyiruko rwo muri aka Karere kwidagadura. Hari kandi ikigo cy’urubyiruko nacyo gifasha kubona aho rumurikira impano zarwo zirimo kubyina n’imikino njyarugamba n’ibindi.
Gatsinzi Marcel, umwe mu rubyiruko, aragira ati: “Iyi Gymnase idufasha kuzamura impano zacu, uzi kuba umuntu azi nko gukina umukino w’amaboko wa basketball akaba yabura ahantu akomeza kugenda azamura impano ye, ariko byaradufashije kuba barazanye iyi nyubako, turaza tugakora imyitozo tugakomeza kuzamura ku buryo tugera naho abatoza baza bakaba bakuramo bamwe na bamwe.”
Shukuru Jeannette, ati: “Muri ibi bihe by’ibiruhuko imfasha gukora imyitozo nkagira imbaraga mu mubiri n’umuvuduko ndetse n’imibiri yacu ikagororoka.”
Kalisa Fidele, we ati: “Turashimira abayobozi bacu kuko kuza hano bimfasha byinshi muri ibi bihe turimo by’ibiruhuko, nko kwirinda ibiyobyabwenge n’izindi ngeso mbi kubera y’uko mpugira mu gukina, no gukora siporo aho kurangara cyangwa kujya mu bidafite akamaro.”
Aganira na MUHAZIYACU, Umuyobozi w’Akarere ka Kirehe, Rangira Bruno yagarutse ku mpamvu nyamukuru bubatse iyi nyubako ndetse asaba abayikoresha kubungabunga iki gikorwaremezo.
Yagize ati: “Ni nyubako twubatse ariko ifatanye n’Ikigo cy’urubyiruko, ni nyubako izajya ifasha mu bikorwa bitandukanye, siporo n’imyidagaduro ariko n’ibindi bikorwa bihuza abantu benshi; impamvu twubatse iyi nyubako ni ukubona ahantu hafasha abaturage bacu, haba urubyiruko n’abakuru kugira ngo tubone aho abantu bahurira ari benshi bagakora ibikorwa bitandukanye.”
Iyubakwa ry’iyi nzu y’imikino n’imyidagaduro riri no mu byatumye ‘Kirehe Volleyball Club’ igaruka mu marushanwa y’umukino wa Volleyball muri shampiyona y’Igihugu, ndetse iyo uhageze usanga mu masaha y’umugoroba abakinnyi b’iyo kipe bari mu myitozo.
