Ku rwibutso rwa Jenoside rwa Nyakarambi mu Karere ka Kirehe kuri uyu wa 16 Mata, habereye igikorwa cyo kwibuka ku nshuro ya 30 abazize Jenoside yakorewe Abatutsi mu 1994 bashyinguwe muri urwo rwibutso.
Iki gikorwa cyo kwibuka cyari cyabanjirijwe n’umugoroba wo kwibuka wakozwe tariki 15 Mata, ahagarutswe ku mateka ya Jenoside yakorewe Abututsi mu yahoze ari komine Rusumo, uburyo abatutsi batotejwe mu itegurwa rya Jenoside n’uko bakorewe ubugome ndengakamere muri Jenoside mu 1994; hanatangwa ubutumwa butandukanye burimo ubuhumuriza abarokotse, no gusaba buri wese guharanira ko Jenoside itazongera kubaho ukundi.
Kuri uyu wa 15 Mata, ku rwibutso rwa Jenoside rwa Kirehe i Nyakarambi rushyinguyemo imibiri y'Abatutsi isaga 12,000 habereye umugoroba wo #kwibuka30 Jenoside yakorewe Abatutsi mu 1994.
Ejo tariki 16 Mata, harakomereza igikorwa cyo kwibuka Abatutsi bashyinguye muri uru rwibutso. pic.twitter.com/CwWDztt38U
— MUHAZI YACU (@muhaziyacu) April 15, 2024
Mu gikorwa cyo kwibuka kuri uyu wa 16 Mata, ifatwa nk’umwihariko wo kwibuka Abatutsi bashyinguwe mu cyubahiro mu Rwibutso rwa Kirehe i Nyakarambi, Senateri Kanziza Epiphanie yavuze ko abantu bakwiye kongera imbaraga mubyo bukora basigasira ibyagezweho, anasaba urubyiruko gukoresha ibyo bize bahangana n’abagoreka amateka ya Jenoside yakorewe Abatutsi.
Yagize ati: “Ni mukore imirimo mushikamye, tugomba gusigasira ibyagezweho, tukubaka u Rwanda ruk ba nka paradizo ariko ya paradizo izira amacakubiri.”
Yakomeje agira ati: “Urubyiruko nk’uko muri amaboko y’u Rwanda kandi yubaka vuba, mumenye amateka kugira ngo muzayahe abandi kuko abakuru barabyina bavamo, niyo mpamvu mugomba gushyiramo akabaraga mukamenya amateka ariko murushaho kurwanya abayagoreka, muzi ikoranabuhanga kandi igihugu cyacu cyakoze igishoboka cyose ngo ikoranabuhanga rigere hose, mwize indimi nyinshi, mugomba gusubiza abagoreka amateka y’u Rwanda mubanyomoza.”
Perezida wa Ibuka mu Karere Kirehe Nduwimana Bonaventure yavuze ko Akarere ka Kirehe yakanguriye buri wese kumenya neza amateka ya Jenoside yakorewe Abatutsi, ati: “Aka karere gafite amateka atandukanye, ndasaba ibigo bitandukanye ko uyu ari umwanya wo kohereza bamwe mubo bahagarariye bakaza ku rwibutso hano no ku zindi nzibutso kwiga amateka, ndabashishikariza gusura urwibutso.”
Umuyobozi w’Akarere ka Kirehe Rangira Bruno, yavuze ko Jenoside yakorewe abatutsi muri 1994 ari amateka y’Abanyarwanda kandi akwiye kubabera isomo ntizasubire ukundi.
Ati: “Ni amateka yacu, aduhe amasomo duharanire ko Jenocide itazongera kubaho ukundi.”
Urwibutso rwa Jenoside yakorewe abatutsi rwa Nyakarambi ruruhukiyemo imibiri y’abatutsi isaga ibihumbi 12.
