Abayobozi n’inzego z’umutekano mu Karere ka Kirehe bafashe umukozi mu rwego rushinzwe umutekano rwa DASSO wo mu Murenge wa Nyamugali ari kugurisha abagabo babiri ibendera ry’igihugu.
Ibi byabereye mu Kagari ka Kazizi, mu Murenge wa Nyamugali, ku itariki 10 Gicurasi. Amakuru agera kuri MUHAZIYACU avuga ko umugambi wo kwiba, gukurisha no kugura iryo bendera aba bagabo batatu bari bawufite kuva muri Mutarama 2020.
Umunyamabanga Nshingwabikorwa w’Umurenge wa Nyamugali Iyamuremye Antoine yabwiye MUHAZIYACU uko amakuru y’aba bagerageje kwiba ibendera no kurigurisha bagatahurwa, yamenyekanye.
Ati: “Ku itariki ya 10 saa kenda na cumi n’itandatu nibwo twafashe umu -DASSO ari kumwe n’umuntu yari amaze guhereza iryo bendera. Ariko n’ubundi twari tumaze iminsi baduhaye amakuru yavugaga ko uwo DASSO ngo yabonye umuntu uzatwara iryo bendera, ngo hari icyo arishakira.”
Akomeza agira ati: “Tubimenye twakomeje gukurikirana ayo makuru, kugeza ubwo uwo DASSO arivana mu Kagari ararimuhereza, uwo muntu amuhereza amafaranga ya avanse ibihumbi 10frw, ngo hari andi ibihumbi 10frw yagombaga kumuhereza. Ni njye wamwifatiye turi kumwe na Polisi n’uhagarariye Ingabo. Twafashe uwo mugabo yari amaze kurihereza dusanga arifite mu mufuka, aratubwira ngo ni Dasso urimpaye; na DASSO arabyemera.”
Aba bagabo babiri bagerageje kugura ibendera ryibwe barimo umwe utuye mu Murenge wa Mahama n’undi utuye mu Murenge wa Nyamugali. Bo na DASSO wari ugiye kuribagurisha bahise batabwa muri yombi, ubu bari gukurikiranwa n’ubugenzacyaha.
Amakuru avuga ko ngo abo bagabo babiri bashakaga ibendera bari barabwiye Umu-DASSO ko ngo ari imari ikomeye kuko ngo umuntu aritwitse ivu ryaryo ryaba ritera ishaba, umuntu akaba yagira igitinyiro ndetse ngo akaba umukire.
Ibendera ryari ryagurishijwe rikagaruzwa ryari ryakuwe mu bubiko mu Kagari ka Kazizi, Umurenge wa Nyamugali.
