Mu gutangiza igihembwe cy’ihinga cya 2024B mu buhinzi bw’umuceri ku rwego rw’Akarere ka Kirehe byabereye mu Murenge wa Mushikiri, Ubuyobozi bwasabye abahinzi kongera igipimo cy’umusaruro uboneka kuri hegitari kikarenga toni 5.8.
Kuri uyu wa Kane, kuri Site ya Binoni mu Murenge wa Mushikiri ni ho hatangirije ku mugaragaro iki gihembwe cy’ihinga, mu gishanga gihingwamo umuceri kuri hegitari 138 gihuriweho n’abahinzi b’umuceri 837 bibumbiye muri Koperative yitwa ‘Mushikiri Rice Growers’ bo mu bice by’imirenge ya Kigina, Kirehe, Nasho na Mushikiri ikora kuri icyo gishanga.
Mu gutangiza iki gihembwe cy’ihinga cya 2024B, Nzirabatinya Modeste, Umuyobozi w’Akarere ka Kirehe wungirije ushinzwe iterambere ry’ubukungu yasabye abahinzi kudakererwa ihinga, bakarangiza gutunganya imirima no gutera imbuto yateguwe hakiri kare, kandi bakita ku gukurikirana umuceri no gufumbira uko bikwiye.
Yaguze ko muri rusange muri aka karere ikigereranyo cy’umusaruro uboneka kuri hegitari ari toni 5.8 kuri hegitari, ariko abahinzi basabwa kunoza ubuhinzi ukiyongera.
Ati: “Turasaba abahinzi kuzamura igipimo cy’umusaruro wera kuri hegitari kuko kimwe mu byiza dufite nka Kirehe ni uko bafite isoko, hari uruganda rwa Kirehe Rice rubagurira umusaruro, ariko turanabasaba kubyaza umusaruro amafaranga babona mu kwiteza imbere, abajyana abana ku mashuri n’ibindi bibazo babashe kubyikemurira biteze imbere.”
Habiyaremye Théoneste Perezida w’iyi koperative yabwiye MUHAZIYACU ko kuri ubu ikigereranyo cy’umusaruro beza kiri hagati ya toni enye n’eshanu kuri hegitari imwe, ariko muri iki gihembwe cya 2024B bafite intego yo kugera nibura kuri toni esheshatu.
Ati: “Ubu twiteguye gutera umuceri, imirima irateguye, imbuto zirahari n’ifumbire irahari nubwo tujya duhura n’imbogamizi ku ifumbire kubera bica muri sisiteme bigatinda ariko twiteguye neza. Dufite intego nka Mushikiri Rice Growers ko guhera muri iki gihembwe cy’ihinga dutangiye, ni iyo kugera nibura kuri toni esheshatu kuri hegitari kuzamura.”
Bamwe mu banyamuryango b’iyi koperative nabo bagaragaza ko hari ingamba bafite,
Nyiranizeyimana Laurence ni umuhinzi w’umuceri kuva muri 2012, awuhinga kuri Are 30 aho asarura nibura toni 1.8, ati: “Njye niyemeje ko ntajya munsi ya y’ibiro nibura 60 kuri Are imwe kandi ubu muri iki gihembwe gishize nubwo ntarahuza neza umusaruro ndizera ko narengejeho.”
Dukuzimana Dominique wo mu Kagari ka Bisagara, uyobora Zone ya Gacenshero na we yagize ati: “Njyewe mpinga umuceri kuri Are 13, ubu ngeze ku musaruro wa toni 1 n’ibiro 10 ubwo bivuze ko kuri Are 1 nazamuyeho ibiro 77 kandi intego mfite ni ukudasubira inyuma; ariko dufite impungenge z’uko umusaruro wazagabanuka muri iki gihembwe cya 2024B kubera hari umwuzure w’iyi mvura idasanzwe iri kugwa.”
Mu Karere ka Kirehe ubuhinzi bw’umuceri bukorerwa kuri hegitari 816 zeraho umuceri ugera kuri toni 4,500, habarizwa Amakoperative atandatu ahinga umuceri; hakaba hari n’uruganda rwa Kirehe Rice Company Ltd rugura rukanatunganya umusaruro w’umuceri rufite ubushobozi bwo gutunganya toni 3,500 kuri buri gihembwe cy’ihinga.
