Umusore w’imyaka 16 wo mu Karere ka Kayonza mu Murenge wa Mukarange, yarohamye mu Kiyaga cya Muhazi nyuma yo kujyanayo na mugenzi we bagiye gushaka ibiti by’imihengeri bakoresha utubati bakatugurisha.
Uyu musore yarohamye ejo kuwa Kabiri tariki ya 7 Ukuboza 2021 muri Muhazi, kugeza ubu ngo ishami rya Polisi rikorera mu mazi-Marine kuva yagwamo riri kumushakisha ariko ntiriramubona.
Umunyamabanga Nshingwabikorwa w’Umurenge wa Mukarange, Gatanazi Longin, aganira na MUHAZIYACU, yavuze ko amakuru y’urupfu rw’uyu mwana bayabwiwe na mugenzi we bari bari kumwe wabonye arohamye akajya gutabaza Polisi.
Yagize ati: “Ni umusore witwa Uwitije Aziri w’imyaka 16 yari ari kumwe n’undi w’imyaka 25 bivugwa ko yamwigishaga kuboha utubati, bari bagiye rero kuri Muhazi gushaka uduti bakoresha tw’imihengeri bari mu mazi bavamo we ararohama undi ajya gutabaza.”
Gatanazi yavuze ko kandi umurambo we utaraboneka aho hitabajwe ishami rya Polisi rikorera mu mazi kugira ngo ribafashe kuwushakisha.
Uyu muyobozi kandi yasabye ababyeyi kuba hafi abana babo bakabarinda kujya mu bintu bibi no kwishora mu Kiyaga cya Muhazi ngo kuko byabakururira ibyago.
Kugeza ubu inzego z’umutekano zikomeje gushakisha uyu musore warohamye mu Kiyaga cya Muhazi.
