Binyuze ku muterankunga Abdul Hakim Bin Herz ukomoka muri Leta zunze ubumwe z’Abarabu, Abayisilamu bo mu Karere ka Bugesera, by’umwihariko abatuye n’abakorera mu Mujyi wa Nyamata, bagiye kubakirwa umusigiti mushya ujyanye n’igihe; biteganyijwe ko uzuzura utwaye miliyoni 400 z’amafaranga w’u Rwanda.
Umushinga wo kubaka uyu musigiti mushya, watangajwe kuri uyu wa Gatanu tariki 23 Mutarama 2026 mu gikorwa cyo gushyira ibuye ry’ifatizo aho ugiye kubakwa, kitabirwa na Mufti w’u Rwanda Sheikh Musa Sindayigaya, Umuyobozi w’Akarere ka Bugesera, Mutabazi Richard, Abdul Hakim Bin Herz watanze inkunga yo kubaka ndetse na bamwe mu bayisiramu basengera i Nyamata.
Mufti w’u Rwanda, Sheikh Musa Sindayigaya, avuga ko uyu musigiti ugiye kubakwa wagizwemo uruhare n’umuterankunga ndetse n’Akarere ka Bugesera kabafashije mu rugendo ryo gushaka ibyangobwa byo kuwubaka. Yatangaje kandi ko uyu musigiti uzubakwa ukarangira mu gihe gito.
Ati: “Ndashimira Akarere ka Bugesera ku bufasha na serivisi ndetse n’urukundo kugira ngo ibintu bigende neza, nkanashimira kandi umufatanyabikorwa wacu waduhaye iki gikorwaremezo. Si uw’inaha ariko yakunze u Rwanda, anakunda no kuza kudufasha kutwubakira igikorwa cy’iterambere kigendanye n’igihe kandi kiduhesha agaciro ndetse kikanahesha agaciro Akarere kacu ka Bugesera.”
Umuyobozi w’Akarere ka Bugesera, Mutabazi Richard na we yagaragaje ko uyu musigiti ugiye kubakwa i Nyamata uzafasha abayoboke ba Islam kandi ko uzahindura isura y’Umujyi.
Ati: “Ni igikorwa cyiza giha abayoboke ba Islam urubuga n’ahantu heza ho gusengera kandi gusenga ni ingenzi. Ariko kandi ni n’igikorwa gihindura isura muri rusange ya Nyamata n’Akarere ka Bugesera.”
Meya Mutabazi kandi yijeje abayoboke b’idini ya Islam ko Akarere kazababa hafi mu mirimo yo kubaka uyu musigiti kugira ngo uzarangirire ku gihe kandi wubatswe mu buryo bwiza.
Ati: “Kuba bigeze aha ngaha ni uko twabikoranye buri wese akuzuza inshingano ku ruhande rwe, ntabwo rero twacukiriza aho ngo noneho umushinga uzazemo ibibazo uzatinde cyangwa ngo bizatunanire. Tuzafatanya dukurikirane umushinga ugende neza, wubakwe mu buryo bwemewe, buhagije, bwujuje ubuziranenge kandi wubakirwe igihe kugira ngo umusaruro utangire kwigaragaza.”
Biteganjijwe ko uyu musigiti ugiye kubakwa uzarangira mu gihe cy’iminsi 180, ni ukuvuga mu gihe kitarenze amezi atandatu (6).
Mu Karere ka Bugesera, kugeza ubu habarurwa abayoboke b’idini ya Islam basaga ibihumbi bitatu.
