Abaturage bo mu gasantere ka Gasange biyemeje kurimbisha agasantere kabo, bavuga ko ari igikorwa bakoze ku bwumvikane bwabo, ubuyobozi burashima aba baturage igitekerezo bagize cyo kuba ahantu hasa neza.
Agantere k’ubucuruzi ka Gasange kari mu Murenge wa Gasange mu Karere ka Gatsibo, kamaze imyaka irenga 40 izwiho ubucuruzi bunyuranye, iki gitekerezo cyo kuharimbisha basiga amarangi asa ku nzu zose zihari ngo cyatangijwe n’abaturage ubwabo.
Bavuga ko byatewe n’uko aho bajya hose mu gihugu hatandukanye basanga imijyi yaho isa neza; nibwo batangije igitekerezo cyo gukora isuku ku mazu yabo bagasiga irangi risa ndetse ngo umuhanda numara kuhagera biteguye kuzasasa amapave.
Twagirayezu Emmanuel ni umucuruzi ukorera mu gasantere ka Gasange, yemeza ko ibi bikorwa byosee haba ubukangurambaga no gushora amafaranga ari umwihariko w’abahakorera n’abahatuye.
Yakomeje agira ati: “Gusiga amarangi asa ni gahunda twakoze kugira ngo umurenge wacu use neza, mbere byari amarangi avangavanze kandi ukabona bisa nabi.”
Iki gikorwa kimaze amezi atatu gitangijwe, abaturage bavuga ko iyi ari imwe mu nzira yo gushimira ubuyobozi bw’igihugu bugiye kubaha umuhanda wa kaburimbo uzaca Kiramuruzi, Murambi, Gasange na Muhura.
Iki gikorwa cyagizwemo uruhare n’abikorera bo mu Murenge wa Gasange, nkuko byemezwa na Karekezi Alexis, umuyobozi wa PSF muri uyu murenge.
Karekezi ati: “Ibi twabikuye ku miyoborere myiza kandi tuba tugomba kugira isuku, isantere yacu nayo igomba kugira isuku.”
Ubwo umuyobozi w’Intara y’Iburasirazuba Mufulukye Fred yasuraga aba baturage, yabashimiye uruhare bagize barimbisha isantere yabo, abasaba gukomeza gufata neza ibikorwa remezo bahabwa kandi bakagira uruhare mu kubirinda.
Isantere ya Gasange ubu nibwo yagezemo amashanyarazi, ndetse n’ibikorwa byo kubaka umuhanda byaratangiye, abaturage biyemeje ko umuhanda wa kaburimbo nuboneka bazarushaho kurimbisha isantere yabo.
