Leta y’u Rwanda n’iya Qatar bari mu biganiro byo gukuriranaho Visa ku baturage bo muri ibyo bihugu bashaka kujya mu bihugu byombi, ingendo zikazajya zikorwa hifashishijwe pasiporo gusa.
Ibi byabaye nyuma y’uruzinduko rw’akazi umukuru w’Igihugu cy’u Rwanda Paul Kagame yagiriye i Doha muri Qatar, aho yakiriwe n’Umunyabanga Mukuru muri Minisiteri y’Ububanyi n’Amahanga wa Qatar, Dr. Ahmad bin Hassen Al-Hammadi kuri uyu wa 11 Gashyantare 2025.
Iyi gahunda yo gukuriranaho Visa kuri ibi bihugu, yemerejwe mu nama ya Guverinoma yari iyobowe na Minisitiri w’Intebe wa Qatar akaba na Minisitiri w’Ububanyi n’Amahanga w’iki gihugu, Sheikh Mohammed bin Abdulrahman bin Jassim bin Jaber Al Thani kuri uyu wa 12 Gashyantare 2025, nk’uko byatangajwe na Ministeri y’Ububanyi n’Amahanga y’iki gihugu.
Mu gihe aya masezerano yaba yemejwe hatabayeho kirogoya, byaba bivuze ko Abanyarwanda bashaka kujya muri Qatar bajya bitwaza urupapuro rwa Pasiporo, ni nako bizajya bigenda mu gihe Abanya-Qatar bashaka kuza mu Rwanda.
Kuva mu mwaka wa 2019 Leta ya Qatar yemereye abaturage b’u Rwanda kujya bajya muri Qatar bakamarayo ukwezi nta Visa bafite bakayishaka nyuma, kimwe mu bintu byoroheje ubucuruzi, ubuhahirane n’ubukerarugendo hagati y’ibihugu byombi.
U Rwanda rusanzwe rufitanye umubano mwiza na Leta ya Qatar mu buzima butandukanye bw’ibihugu byombi, by’umwihariko mu bwikorezi bwo mu kirere, mu mwaka wa 2018, Leta ya Qatar binyuze muri Qatar Airways yiyemeje kwagura ikibuga cy’indege cya Bugesera, byari biteganijwe ko Leta y’u Rwanda yari kucyubaka kikuzura mu mwaka wa 2024, gusa nyuma y’uko Leta ya Qatar yiyemeje kucyagura biteganijwe ko kizuzura 2026, aho Leta ya Qatar izaba ifitemo 60%, ikaba yarashoyemo arenga miliyoni 780$.
Biteganijwe kandi ko Leta ya Qatar igiye kugura imigabane muri Rwanda Air aho uyu mushinga niwemezwa izaba ifitemo 49%.
Si mu bwikorezi n’ubukerarugendo gusa, no mu mutekano Leta y’u Rwanda ikomeje gufatanya n’iya Qatar, aho mu mwaka wa 2024 Polisi y’u Rwanda n’Urwego rushinzwe umutekano w’imbere mu gihugu cya Qatar, Lekhwiya, byasinye amasezerano y’imikoranire agamije gushimangira ubufatanye bw’impande zombi mu byerekeye umutekano no guhangana n’ibyaha.
