Bamwe mu baturage bo mu Karere ka Gatsibo bavuga ko imurikabikorwa ry’abafatanyabikorwa ribasigiye isomo ryo gukora ubuhinzi bwabo mu buryo bwa kinyamwuga, bityo ko bakazarushaho kubona umusaruro wisumbuye mu buhinzi bwabo kugira ngo bihute mu iterambere.
Ibi byagarutsweho ubwo kuri uyu wa Gatanu, tariki ya 14 Kamena, hasozwaga Imurikabikorwa ry’Abafatanyabikorwa mu iterambere ry ‘Akarere (JADF) ry’Akarere ka Gatsibo
Niyonizeye Valens yagize ati: “Mu buhinzi nakuyemo isomo ryo guhinga neza kugira ngo mbone umusaruro uhagije wo kujyana ku isoko ndetse n’Igihugu gitere imbere.”
Kayitesi Claudine na we avuga ko iri murikabikorwa ryamwigijishe guhinga afite intego, ibyo bikazatuma yeza byinshi kandi yahinze ubuso buto.
Abitabitiye iri murikabikorwa bavuga ko uretse kunguka amafaranga ngo byanabahaye andi mahirwe yo kumenyekanisha ibyo bakora.
Ayingeneye Apoline yagize ati: “Inyungu ziri hano cyane ni uko bigiye gutuma ibikorwa byacu bimenyekana hirya no hino mu Gihugu.”
Himbaza John na we ati: “Nk’abikorera cyane cyane rino murikabikorwa ryadufashije mu kwamamaza ku bantu, guhera ku bacuruzi bakomeye barangura byinshi ndetse kugera ku muturage wo hasi washakaga kamwe abenshi wasanga batazi ko mu Rwanda hakorerwa mavuta, isabune ndetse n’ibi twazanye hano.”
Abafatanyabikowa bamuritse ibyo bakora bitandukanye ariko ibyinshi muri byo bishingiye ku ubuhinzi n’ubworozi dore ko ari kimwe mu bikorwa by’ingenzi by’iterambere aka karere gashingiyeho.
Umuyobozi w’Akarere ka Gatsibo wungirije ushinzwe Iterambere ry’Ubukungu Sekanyange Jean Leonard avuga ko gukora ibikorwa nk’ibi by’imurikabikorwa ari nk’urugendoshuri kugira ngo abaturage banoze ibyo bakora.
Ati: “Ahangaha muri iri murikabikorwa rero ni nk’urugendoshuri ni ho abaturage baza bakahigira byinshi cyane.”
Sekanyange yakomeje agira ati: “Abaturage bahakura n’ubundi bumenyi butandukanye nubwo bari bafite, bishobora gutuma barushaho gukora neza bakabona umusaruro uhagije.”
Iri murikabikorwa ry’abafatanyabikorwa riba buri mwaka mu Karere ka Gatsibo.
Ubuyobozi bw’akarere ka Gatsibo bwatangaje ko bugiye gusuzuma uburyo iri murikabikorwa umwaka utaha wa 2025 amasaha yo gukora yaziyongera ndetse rimare iminsi irenga irindwi.
